ޒަކާތު މަހާސިންތާއިން ލިބިގެންދިޔަ މަޢުލޫމާތުގެ އަލީގައި ރާއްޖޭގެ ޒަކާތުގެ ނިޒާމު ހަރުދަނާކުރެއްވުމަށް މުހިއްމު މަސައްކަތްތަކެއް ކުރައްވާނެކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު މިހެން ވިދާޅުވީ ރާއްޖޭގައި ބޭއްވި ފުރަތަމަ ބައިނަލްއަޤުވާމީ ޒަކާތު މަހާސިންތާ ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ރާއްޖޭގައި ބޭއްވި ބައިނަލްއަޤުވާމީ ޒަކާތު މަހާސިންތާ ނިންމުމުގެ ރަސްމިއްޔާތު ޝަރަފުވެރިކޮށްދެއްވާ.ވާހަކަފުޅުދައްކަވަމުން އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ، މިފަދަ މަހާސިންތާއެއް ބޭއްވުމުގެ މުހިއްމުކަން ބައެއް މީހުންނަށް ވަޒަން ނުކުރެވުނުނަމަވެސް، މިއީ ދެމެހެއްޓެނިވި ގޮތުގައި ދާއިރާ ތަރައްޤީކުރުމަށް ކޮންމެހެން ކުރަންޖެހޭކަމެއްކަމަށެވެ.
ވަޒީރު ވިދާޅުވީ ޢިލްމީ ދިރާސާތަކުގެ އަލީގައި ކުރެވޭ މަޝްވަރާތަކުން އަދި މަހާސިންތާއަށް ހުށަހަޅާ ހުށައެޅުންތަކުގެ ސަބަބުން ރަނގަޅު ނަތީޖާ ނެރެވޭނެކަމަށެވެ. އަދި މިމަހާސިންތާގެ ތެރެއިން ލިބިގެންދިޔަ ޢިލްމީ މަޢުލޫމާތުގެ އަލީގައި ރާއްޖޭގެ ޒަކާތުގެ ނިޒާމު އިތުރަށް ވަރުގަދަކުރުމަށް މުހިއްމު މަސައްކަތްތަކެއް ކުރައްވާނެކަމަށްވެސް ވަޒީރު ވިދާޅުވިއެވެ.
"ބައެއް ފަރާތްތަކަށް ބޭކާރުކަމެއްގެ ގޮތުގައި ދެކުނުނަމަވެސް، މިފަދަ މަހާސިންތާތަކަކީ އަދި ބައްދަލުވުންތަކުގައި ކުރެވޭ މަޝްވަރާތަކަކީ މުހިއްމު މަޝްވަރާތަކެއް. އަދި މިމަހާސިންތާގައި ލިބިގެންދިޔަ މަޢުލޫމާތުގެ އަލީގައި ރާއްޖޭގެ ޒަކާތުގެ ނިޒާމު މިހާރަށްވުރެ ހަރުދަނާކުރުމަށް މަސައްކަތްކުރާނެކަމުގެ ޔަގީންކަން އަޅުގަނޑުދެން." ވަޒީރު ވިދާޅުވިއެވެ.
އެއް ދުވަހުގެ މުއްދަތަކަށް ކުރިއަށްގެންދިޔަ މިމަހާސިންތާގައި ޒަކާތާއި ގުޅުންހުރި މުހިއްމު މަޢުޟޫތަކަށް އަލިއަޅުވާލެވިފައިވެއެވެ. އެގޮތުން ޒަމާނާއެކު ބަދަލުނުވާނެ ޝަރީޢަތުގެ އުސޫލުތަކާއި މިދާއިރާއިން ޒަމާނީގޮތުން ކުރިމަތިވަމުންދާ ގޮންޖެހުންތައް ދެނެގަތުމަށް ދިރާސާކުރުމުގެ މުހިއްމުކަމާއި، ޙާލަތްތަކާއި ގުޅިގެން ޒަކާތް ތަރައްޤީކުރުމުގެ މުހިއްމުކަމުގެ މައްޗަށްވަނީ މަޝްވަރާކުރެވިފައެވެ.
މީގެއިތުރުން ޒަކާތުގެ ބެހެނިވެރިންގެ މަފްހޫމް ފުޅާކުރުމާއި، ޒަކާތު ފަންޑު ގުނަކުރުމާއި، ޒަކާތުގެ ބެހެނިވެރިން މާލީގޮތުން ބާރުވެރިކުރުވުމުގެ މުހިއްމުކަމުގެ އިތުރުން ޤާނޫނީގޮތުން ގެންނަންޖެހޭ ބަދަލުތަކާއި، ޒަކާތުގެ ދާއިރާ ހަރުދަނާކުރުމަށް ޒަމާނީ އީޖާދުތަކުގެ ބޭނުންކުރުމާއި ގުޅޭގޮތުން ވަނީ މަޝްވަރާކޮށްފައެވެ. މިމަހާސިންތާގައި ރާއްޖޭގެ ޒަކާތުގެ ދާއިރާ ހަރުދަނާކުރުމަށް ކުރެވިދާނެ ކަންކަމުގެ ގޮތުގައި ބައިވެރިން ވަނީ 24 ކަމެއް ފާހަގަކޮށް މޯލްޑިވްސް ޒަކާތު ހައުސްއަށް ހުށައަޅާފައެވެ.
ރާއްޖޭގައި ބޭއްވި ފުރަތަމަ ޒަކާތު މަހާސިންތާގައި ރާއްޖޭގެ އެކި މުއައްސަސާތަކާއި، މެލޭޝިޔާގެ ބައެއް މުއައްސަސާތަކުން ވަނީ ބައިވެރިވެފައެވެ. މަހާސިންތާގެ ޕެނެލިސްޓުންގެ ގޮތުގައި ރާއްޖޭގެ މަޝްހޫރު ދީނީ ޢިލްމުވެރިންނާއި، އިސްލާމިކް ފައިނޭންސާއި އިޤްތިޞާދީ ދާއިރާގެ މާހިރުން ބައިވެރިވެވަޑައިގެންނެވިއެވެ.