ސަރުކާރުގެ ވިޔަފާރި ކުންފުނި، އެސްޓީއޯއިން އާންމު ވިޔަފާރިތަކުން ވިއްކާ ބާވަތުގެ މުދާ ގެނެސް މާ އަގުހެޔޮކޮށް ވިއްކައި، ކުދި އަދި މެދުފަންތީގެ ވިޔަފާރިތަކާ ވާދަކުރާތީ ވިޔަފާރިވެރިން ކަންބޮޑުވުން ފާޅުކޮށްފި އެވެ.
އެސްޓީއޯއިން އެތަކެތި ގެނެސް ވިއްކަނީ އަސްލު ތަކެތި ގަތް އަގަށްވުރެ ހެޔޮ އަގުގައި، ގެއްލުމުގައި ކަމަށް އަމިއްލަ ވިޔަފާރިވެރިން ބުނެ އެވެ. ކުދި ވިޔަފާރިތަކުގެ އެންމެ ބޮޑު ކަންބޮޑުވުމަކީ އެއީ އެވެ.
އެސްޓީއޯއިން އެންމެ ބޮޑު އާމްދަނީއެއް ހޯދަނީ ތެލުންނެވެ. ތެލުގެ ވިޔަފާރިން ލިބޭ ބޮޑު މަންފާގެ ސަބަބުން އެހެން މުދާ ގެނެސް ނުއަގުގައި ވިއްކި ނަމަވެސް އެ ކުންފުންޏަށް ގެއްލުމެއް ނުލިބޭނެ އެވެ. އެހެންކަމުން އަމިއްލަ ވިޔަފާރިތަކަށް އެސްޓީއޯއިން ވިއްކާ އަގުގައި އެ މުދާ ނުވިއްކޭނެ އެވެ.