ސިޔާސީ ޕާޓީތައް ހިންގާ ގޮތާއި، ސިޔާސީ ހަރަކާތްތައް ރާވާ، އިންތިޒާމު ކުރާ ގޮތް ވާދަވެރިންނަށް ދަސްކޮށްދޭނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕަރސަން އަބްދުއްރަހީމް އަބްދުﷲ ވިދާޅުވެއްޖެއެވެ.
މިއަދު ބޭއްވި ޕީއެންސީގެ އެތެރޭގެ އިންތިޚާބަށް ފަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިންގެ ސުވާލުތަކަށް ޖަވާބުދެއްވަމުން އަބްދުއްރަހީމް ވިދާޅުވީ ޕީއެންސީއަކީ މިވަގުތު ދިވެހިރާއްޖޭގައި އޮތް އެންމެ ބޮޑު ޕާޓީ ކަމަށެވެ. އަދި އެ ޕާޓީން މަސައްކަތް ކުރާނީ ޕާޓީ އިތުރަށް ވަރުގަދަ ކުރުމަށް ކަމަށެވެ.
އަބްދުއްރަހީމް ވިދާޅުވީ އެ ޕާޓީއަކީ ޑިމޮކްރަސީގެ ހަމަތަކަށް ވެސް އެންމެ ފުރިހަމައަށް މިހާރު އަމަލުކުރަމުންދާ ޕާޓީ ކަމަށެވެ. އެހެން ކަމުން އެހެން ޕާޓީތަކުން ޕީއެންސީ ނަމޫނާއަކަށް ބަލަން ޖެހިފައިވާ ކަމަށް ވެސް އަބްދުއްރަހީމް ވިދާޅުވިއެވެ.
އަބްދުއްރަހީމްގެ އިތުރުން އެ ޕާޓީގެ ލީޑަރޝިޕްގެ ގިނަ ބޭފުޅުން ވަނީ އެކަމަށް އެއްބަސްވެވަޑައިގެން ވާޙަކަ ދައްކަވާފައެވެ.