ވެރިކަންކުރާ ޕާޓީ، ޕީއެންސީއިން މިރޭ ބާއްވާ ޖަލްސާއާ ގުޅިގެން، މާލެ އާއި ހުޅުމާލެއާ ދެމެދު ދަތުރުކުރާ ފަސް ރޫޓެއްގެ ބަހުގެ ހިދުމަތް މެދުކަނޑާލައިފި އެވެ.
ވީ ކިހިނެއް؟ - 'ދިވެހީންގެ ރާއްޖެ' ނަމުގައި ޕީއެންސީން މިރޭ 8:30ގައި އާޓިފިޝަލް ބީޗުގައި ބާއްވާ ޖަލްސާއާ ގުޅިގެން ފުލުހުން ވަނީ، ބޮޑުތަކުރުފާނުމަގުގެ ރާޅުގަނޑާ ހިސާބުން ފެށިގެން ކާނިވާ ސަރަހައްދާއި އެ ސަރަހައްދާ އިންވެގެން އޮންނަ ގޯޅިތައް ވެސް ބަންދުކޮށްފަ އެވެ.
ތަފްސީލް - އެމްޓީސީސީން މިރޭ ނެރުނު އެންގުމެއްގައިވާ ގޮތުން، މާލޭގައި ބަހުގެ ހިދުމަތް ދެމުންދާ ބައެއް ރޫޓުތައް ބަންދުކުރަނީ މިރޭ އިރުއޮއްސި 6 އިން ފެށިގެން 12:30ގެ ނިޔަލަށް އާޓިފިޝަލް ބީޗު ސަރަހައްދު ބަންދުކޮށްފައިވާތީ އެވެ.
މެދުކަނޑާލާ ރޫޓުތަކުގެ ތެރޭގައި ހުޅުމާލޭގެ ދެ ފިޔަވައްސާއި މާލެއާ ދެމެދު ދަތުރުކުރާ އެންމެ ބާރުބޮޑު ބަސް ރޫޓުތައް ހިމެނެ އެވެ.
ބަހުގެ ހިދުމަތް މެދުކަނޑާލާ ރޫޓުތަަކަކީ:
އާރް 2 
އާރް 8 
އާރް 10 
އާރް 11
އާރް 12
މި ސަރުކާރަށް ދެ އަހަރު ފުރޭ މުނާސަބަތުގައި ބާއްވާ މި ޖަލްސާއަކީ ރައީސް މުހައްމަދު މުއިއްޒަށް އޮތް ތާއީދު މުޅި ރާއްޖެއަށް ދައްކައިދިނުމުގެ ހަރަކާތެއް ކަމަށް ޕީއެންސީން ބުނެ އެވެ.