ރާއްޖޭގެ ބައިނަލްއަގްވާމީ ބަނދަރުތައް ބެލެހެއްޓުން ހަރުދަނާކުރުމަށާއި، ސަވެއިލެންސްގެ މަސައްކަތަށް 82 ފޫޓުގެ ޕެޓްރޯލް ވެސަލްއެއް ޖަޕާނު ސަރުކާރުން، މޯލްޑިވްސް ކަސްޓަމްސް ސާވިސްއަށް ހަދިޔާކޮށްފިއެވެ. މިއީ، ރާއްޖޭގެ ބަނދަރުތައް ބެލެހެއްޓުން ހަރުދަނާކުރުމަށާއި ސަވެއިލެންސްގެ މަސައްކަތަށް، ޖަޕާން ސަރުކާރުގެ "އިކޮނޮމިކް ކޯޕަރޭޝަން ގްރާންޓް އެކްޓް" ގެ ދަށުން ހަދިޔާކުރި އުޅަނދެކެވެ. މި އުޅަނދު އޮޕަރޭޓްކުރުމަށް ރޭވިފައި ވަނީ މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑްއާއި، މޯލްޑިވްސް ކަސްޓަމްސް ސާވިސް ގުޅިގެންނެވެ. ޖަޕާނުން ރާއްޖެއަށް ހަދިޔާކުރި 82 ފޫޓުގެ އުޅަނދު ހަވާލުކުރުން -- ފޮޓޯ/ ކަސްޓަމްސް މި އުޅަނދުގެ އޮޕަރޭޓްކުރުމަށް ބޭނުންވާ ތަމްރީނުތައް ޖަޕާނާއި ދިވެހިރާއްޖޭގައި ހިންގާފައިވާއިރު، މި ތަމްރީން ޕްރޮޕްރާމްތަކުގައި ކަސްޓަމްސްގެ 23 އޮފިސަރަކު ބައިވެރިވެފައިވެއެވެ. މި އުޅަނދު ރަސްމީކޮށް ހަވާލުކޮށްދެއްވީ، ޖަޕާން އިން ދިވެހިރާއްޖެއަށް ކަނޑައަޅުއްވާފައިވާ ސަފީރު މިސް އިޝިގާމީ ރުމީކޯއެވެ. ދިވެހި ސަރުކާރުގެ ފަރާތުން މި އުޅަނދާ ހަވާލުވެ ވަޑައިގެންނެވީ ހޯމް މިނިސްޓަރު އަލީ އިހުސާނުއެވެ. https://x.com/CustomsMv/status/1994664539779207555 އެކަމަށްޓަކައި މިދިޔަ ބުރާސްފަތި ދުވަހު ބޭއްވި ހަފްލާގައި ކަސްޓަމްސްގެ ކޮމިޝަނާ ޖެނެރަލް ފާތިމަތު ދިޔާނާއާއި، ކަސްޓަމްސްގެ އިސްވެރީން ބައިވެރިވެ ވަޑައިގެންނެވިއެވެ. އެ ހަފްލާއަށް ފަހު މިނިސްޓަރު އިހުސާނާއި، ޖަޕާނުގެ ސަފީރު އަދި ރަސްމިއްޔާތުގައި ބައިވެރިވެ ވަޑައިގެންނެވި އެންމެހާ ބޭފުޅުން ވަނީ އެ އުޅަނދު އޮތް މާލޭ ކޮމާޝަލް ހާބަރަށް ވަޑައިގެން އުޅަނދު ބައްލަވާލައްވައިފައެވެ.