ތޫފާން 'ދީތްވާ' ގެ އަސަރު ސްރީ ލަންކާއަށް މިހާރު ކުރަމުން އަންނައިރު، މުޅި ލަންކާގެ ކަރަންޓު ޚިދުމަތަށް ބުރޫއަރައި، 200،000 މީހުން ކަނު އަނދީރީގައި ތިބެން ޖެހިއްޖެއެވެ. ސިލޯނު އިލްކެޓްރިސިޓީ ބޯޑު (ސީއީބީ) ގެ ޑެޕިއުޓީ ޖެނެރަލް މެނޭޖަރު ނޯއެލް ޕްރިޔަންތާ ވިދާޅުވި ގޮތުގައި ސީއީބީގެ ހަތް މިލިއަން ކަސްޓަމަރުންގެ ތެރެއިން ގާތްގަނޑަކަށް 25 ޕަސެންޓް ކަސްޓަމަރުންނަށް ކަރަންޓް ކެނޑިފައިވާ ކަމަށެވެ. ކަރަންޓުގެ ޚިދުމަތް އަލުން ދިނުމުގެ މަސައްކަތްތައް ކުރިއަށްދާއިރު، ތޫފާންގެ ސަބަބުން އެކަން ކުރުމުގައި ދަތިތަކެއް ހުރި ކަމަށް ޕްރިޔަންތާ ފާހަގަކުރެއްވިއެވެ. އެންމެ ގިނަ ގޭގެއިން ކަރަންޓުގެ ޚިދުމަތް ކެނޑިފައި ވަނީ މެދުތެރޭ ޕްރޮވިންސުގައި ކަމަށާއި، އެ ސަރަހައްދުން 20،000 އަށްވުރެ ގިނަ ކޭސް ރިޕޯޓުކޮށްފައިވާ ކަމަށް ސީއީބީއިން ހާމަކުރެއެވެ. ތޫފާްންގެ ސަބަބުން ލަންކާގެ މަގަކަށް ގަހެއް ވެއްޓިފައި -- ފޮޓޯ/އޭޕީ ސީއީބީން 9،000 މީހުންގެ ޓެކްނިކަލް ޓީމެއް ކަރަންޓުގެ ޚިދުމަތް ދިނުމަށް މަސައްކަތް ކުރަމުން އައި ނަމަވެސް މަގުތަކުގެ ހާލަތު ހުރި ގޮތުން ގޮތުން ކަރަންޓް ފުރިހަމައަށް އަލުން ދިނުމަށް ވަގުތު ނަގާނެ ކަމަށް ޕްރިޔަންތާ އިތުރަށް ވިދާޅުވިއެވެ. ތޫފާން 'ދީތްވާ' ގެ އަސަރު ލަންކާއަށް ވަރަށް ބޮޑަށް ކުރަމުން އަންނައިރު، ތޫފާންގެ ސަބަބުން ހިނގި އެތައް ހާދިސާއެއްގައި މަރުވި މީހުންގެ އަދަދު މިހާރުން ވަނީ 136 އަށް އުފުލިފައެވެ. ބޭ އޮފް ބެންގާލްގެ ހުޅަނގުން ލަންކާ ކައިރިން އުފެދިފައިވާ އެ ތޫފާން މިހާރު އަންނަނީ އިންޑިއާގެ އުތުރު ތަމިލް ނާޑޫ، ޕުޑުޗެރީ އަދި އަންދްރާ ޕްރަދޭޝްގެ ދެކުނު އައްސޭރިފަށާ ކައިރިވަމުންނެވެ. މާދާމާ ހެނދުނުގެ ވަގުތެއްގައި އެ ސަރަހައްދުތަކަށް ތޫފާން އަރާނެ ކަމަށްވެސް މޫސުމާބެހޭ އިދާރާތަކުން ލަފާކޮށްފައިވެއެވެ.