ދިވެހިރާއްޖޭގެ ސިޔާސީ މަސްރަހުގައި އެންމެ ބޮޑު އަދި ނުފޫޒު ގަދަ ޕާޓީކަމުގައިވާ ޕީއެންސީއިން މިހާރު ވަނީ އެ ޕާޓީގެ މެންބަރުޝިޕް އިތުރުކުރުމަށް ވަރަށް ބޮޑު މަސައްކަތްތަކެއް ފަށާފައެވެ. މި މަސައްކަތުގެ މައިގަނޑު މަޤްޞަދަކީ މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒުއަށް ދެވަނަ ދައުރެއް ހޯދައިދިނުމެވެ. އެގޮތުން ރާއްޖޭގެ އެކި ކަންކޮޅުތަކުގައި ޕާޓީއަށް މެންބަރުން އިތުރުކުރުމަށް ހާއްސަ ކެމްޕޭންތައްވެސް ޕީއެންސީން ދަނީ ކުރިޔަށް ގެންދަމުންނެވެ.                     
ޕީއެންސީއަކީ ރާއްޖޭގައި މިހާރު ތިބި ސިޔާސީ ޕާޓީތަކުގެ ތެރެއިން އެންމެ މެންބަރުން ގިނަ ޕާޓީއެވެ. އަދި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް ފަހު، ރާއްޖޭގައި އެއްލައްކަ މެންބަރުން ހަމަކުރާ ދެވަނަ ސިޔާސީ ޕާޓީއަކަށް ޕީއެންސީ ވާނެކަމަށް އެ ޕާޓީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެފައިވެއެވެ. ޕާޓީއަށް މެންބަރުން އިތުރުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފުރަތަމަ ކަނޑައެޅުއްވި އަމާޒު މިހާރު ހާސިލްވެފައިވާއިރު، މިހާތަނަށް 97,000 އަށްވުރެ ގިނަ ފޯމު ލިބިފައިވާކަން އެ ޕާޓީން ވަނީ ހާމަކޮށްފައެވެ.
ޕާޓީގެ އެތެރޭގެ ދަފްތަރުގައި 75,000 އަށްވުރެ ގިނަ މެންބަރުން މިހާރުވެސް އެޕާޓީގައި އެބަތިއްބެވެ. އަދި އިލެކްޝަންސް ކޮމިޝަނުގެ ޕްރޮސެސް ތެރެއިން މި އަދަދު ކޮންމެ ހަފްތާއަކު އިތުރުވަމުންދާކަންވެސް އަބްދުއްރަހީމް ވަނީ ދާދި ފަހުން ފާހަގަކުރައްވާފައެވެ. ކުރު މުއްދަތެއްގެ ތެރޭގައި ގިނަ ޢަދަދެއްގެ މެންބަރުން ސޮއިކޮށްފައިވުމަކީ ޕާޓީއަށް ލިބޭ ކުރިއެރުމެއްކަމަށް ފާހަގަކުރައްވަމުން، ޢަބްދުއްރަޙީމް ވިދާޅުވީ ޕާޓީ ހިންގުން ހަރުދަނާ ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމަށާއި މިހާރު އެ ޕާޓީއަށް ލިބެމުންދާ ކާމިޔާބީތަކުން އެނގިގެންދަނީ ރައްޔިތުން ރައީސުލްޖުމްހޫރިއްޔާ އަދި ޕާޓީގެ ސިޔާސަތުތައް ބަލައިގަނެފައިވާކަން ކަމަށެވެ.
ރާއްޖޭގެ ވެރިކަމުގެ ނިޒާމު އޮތްގޮތުން ވެރިކަމަށް ވަޑައިގަންނަވަނީ ސިޔާސީ ޕާޓީއެއްގެ ޓިކެޓުގައި ކަމަށްވުމާއެކު، މި ނިޒާމުގައި އެންމެ ބާރުގަދަ އެއް ފަރާތަކަށް ސިޔާސީ ޕާޓީ ވާންޖެހޭނެކަމަށް ރައީސުލްޖުމްހޫރިއްޔާ ޤަބޫލުކުރައްވައެވެ. އެހެންކަމުން، ޕާޓީ ވަރުގަދަ ކުރުމަށް ރައީސުލްޖުމްހޫރިއްޔާ ވަރަށް އިސްކަންދެއްވާކަން ޕީއެންސީން ވަނީ ބުނެފައެވެ.
ރާއްޖޭގައި ޢަމަލުކުރަމުންދާ ފެހި ޤާނޫނު އަސާސީގެ ދަށުން ރިޔާސީ ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގަންނަވާނެކަމަށް ޢަބްދުއްރަޙީމް ވަނީ ވިދާޅުވެފައެވެ. ޕީއެސްއެމް ނިއުސްގެ "ހަފްތާ 52" ޕްރޮގްރާމުގައި ވާހަކަފުޅު ދައްކަވަމުން، އަބްދުއްރަހީމް ފާހަގަކުރެއްވި ގޮތުގައި ރާއްޖޭގައި ވެރިކަން ކުރާ ޕާޓީއަކީ ރާއްޖޭގައި މިހާރު އޮތް އެންމެ ބޮޑު ސިޔާސީ ޕާޓީއަށްވެފައި ރައީސް މުއިއްޒުއަށް ދެވަނަ ދައުރެއް ހޯދައިދެއްވުމަށް މިހާރުވެސް ޕީއެންސީން ވަނީ ފޫގަޅާފައެވެ. ސަބަބަކީ ރައީސް މުއިއްޒުގެ ސަރުކާރަކީ ވަރަށް ކާމިޔާބު އަދި ރައްޔިތުންނަށް ތަފާތު ކުރުމެއް ނެތި ޚިދުމަތް ދެމުން އަންނަ ސަރުކާރަކަށް ވީތީއެވެ.
ރައީސް މުއިއްޒުގެ ތަރައްޤީގެ ސްޕީޑު މިހާރު ހުރި މިންވަރަށް ބަލާލާއިރު އެމަނިކުފާނަށް ދވަނަ ދައުރެއް ދެއްވަން ޖެހޭ ކަމަށް ޕީއެންސީން އަދި ރައްޔިތުންވެސް ގަބޫލުކުރެއެވެ. ސަރުކާރަށް 52 ހަފްތާ ވެގެންދިޔައިރު އެމަނިކުފާނުގެ މޭސްތިރިކަމުގައި ރާއްޖެއަށް ގެނެވުނު ތަރައްޤީ އާއި ލިބުނު ކާމީޔާބީތައް ވަރަށް ގިނައެވެ. އެގޮތުން ބަލާލާއިރު:
1. ރާއްޖޭގެ އިޤްތިޞާދީ ތަރައްޤީއަށް ގެނެސްދީފައިވާ ކުރިއެރުންތައް
2. ބޯހިޔާވަހިކަމުގެ މައްސަލައަށް ހޯދައިދީފައިވާ ހައްލުތައް
3. ޞިއްޙީ ދާއިރާގައި ގެނެސްދީފައިވާ ކުރިއެރުންތައް
4. ބައިނަލްއަޤްވާމީ މުޖުތަމަޢުގައި ދިވެހިރާއްޖޭގެ ޤަދަރު އުފުލިފައިވާ މިންވަރު
5. ދަރަނި އަދާކުރުމުގައި އެމަނިކުފާނު ގެންގުޅުއްވާ ސިޔާސަތު ފަދަ ގިނަ ކަންތައްތައް ފާހަގަކުރެވެއެވެ.
އަންނަ އަހަރަކީ ރާއްޖޭގެ ތާރީޚުގައި ދުވަހަކުވެސް ތަރައްޤީގެ މަޝްރޫޢުތައް ނުހިނގާ މިންވަރަށް ހިނގާނެ އަހަރެއްކަމުގައި ރައީސް މުއިއްޒު ވަނީ ވިދާޅުވެފައެވެ. ނިމިދިޔަ ރިޔާސީ އިންތިހާބުގައި ރައީސް މުއިއްޒު ރައްޔިތުންނަށް ވެވަޑައިގެންނެވި ހުރިހާ ވައުދުތައް މިދައުރުގައި ނިންމުމަށް ސަރުކާރުން އަމާޒު ހިފާފައިވާއިރު، ޕީއެންސީން ބޭނުންވަނީ މިފަދަ ގިނަ ޚިދުމަތްތައް ރައްޔިތުންނަށް ފޯރުކޮށްދީ އަންނަން އޮތް ޖީލަށް މުޅިން ތަފާތު "ދިވެހީންގެ ރާއްޖެ" އެއް ބިނާކުރުމަށެވެ. އަންނަ އަހަރު ވެގެންދާނީ ރާއްޖޭގެ ތަރައްޤީއަށާއި ބޯހިޔާވަހިކަމަށް އިންގިބާލީ ބިނާކުރުވަނިވި ގިނަ ތަފާތު ބަދަލުތަކެއް ގެންނާނެ އަހަރަކަށެވެ.
އެފަދަ ގިނަ ސަބަބުކާހުރެ، ރައްޔިތުންގެ ތާއީދު ރައީސް މުޢިއްޒަށް އިތުރުވަމުންދާއިރު، ބައެއް ސިޔާސީ ލީޑަރުން ސިޔާސީ މަޝްރަޙުން ގެއްލެމުންދާކުންދާކަން ފާހަގަކުރެވެއެވެ. އަދި ހަމައެއާއެކު ގައުމު ފިތުނަ ފަސާދަކޮށް ރައްޔިތުންގެ ހިތުގައި ޝައްކާއި ވަހުމު އުފައްދަން އިދިކޮޅުން ދަނީ ކެނޑިނޭޅި މަސައްކަތްކުރައްވަމުންނެވެ. ނަމަވެސް އެ ހުރިހާ މަސައްކަތް ފެނަށްވެގެންދަނީ ސަރުކާރުން ކުރާ ހުރިހާ ކަމެއް ރައްޔިތުންނަށް ހާމަކޮށްދީ ދެފުށް ފެންނަ ވެރިކަމެއް ރާއްޖޭގައި ހިންގަމުންދާތީއެވެ.
އެހެން ސަރުތަކާއި ޚިލާފަށް މި ސަރުކާރުން ދަނީ ސަރުކާރުން ކުރާ ކޮންމެ ކަމެއް އަދި އަޅާ ނުވަތަ އަޅަން ނިންމާ ކޮންމެ ކަމެއް ރައްޔިތުންނަށް ހާމަކޮށް އެކަމުގައި ރައްޔިތުންގެ ލަފާވެސް ހޯދަމުންނެވެ. ރައީސް މުއިއްޒު ވެރިކަމަށް ވަޑައިގެންނެވިއިރު އެކަމާ ދެކޮޅު ހެދި ބައެއް ސިޔާސީ ބޭފުޅުންވެސް އެމަނިކުފާނުގެ ނަޒާހަތްތެރިކަން ދެކި، އެއީ ގައުމު ދެކެ ލޯބިވާ ތެދުވެރި، އަމާންތެރި ވެރިޔެއްކަން ދެނެގަނެވި މިހާރު ދަނީ ސަރުކާރާއި ގުޅިވަޑައިގެން ޕީއެންސީން އަދި ރައީސް މުއިއްޒު ކުރައްވަމުންގެންދަވާ ގައުމީ މަސައްކަތްޕުޅުގައި ބައިވެރިވަމުންނެވެ. ހަޤީޤީ މާނައިގައި ބުނާނަމަ ރައީސް މުއިއްޒުގެ އިޚުލާސްތެރިކަން ފެނި ޕީއެންސީ ދުވަހެއް ދުވަހެއް އެދަނީ ވަރުގަދަވެ ފަހުލަވާނުންގެ ސަފު ބޮޑުވަމުންނެވެ. މިއީ ރައީސް މުއިއްޒު ދެކެވަޑައިގަންނަވަން ބޭނުންފުޅުވާ މަންޒަރެއް ކަމަށް ޕީއެންސީން ވަނީ ބުނެފައެވެ. އެގޮތުން ހުރިހާ ރައްޔިތުން އެއްބައިވަންތަކަމާއެކު ސަރުކާރާއެކު މި ގައުމީ މަސައްކަތުގައި ބައިވެރިވެ އެމަނިކުފާނު ގައުމަށް ގެންނަން ބޭނުންފުޅުވާ ތަރައްޤީ ގެނައުމަކީ ސަރުކާރުގެވެސް އަމާޒެކެވެ.