ޙައްޖުގެ މަތިވެރި އަޅުކަން އަދާކުރުމަށްފަހު ރާއްޖެ އަންނަ ޙައްޖާޖީންގެ ފަހު ފްލައިޓު ފުރައިފިއެވެ.
ޤައުމީ އެއަރލައިން މޯލްޑިވިއަންގެ ފުލައިޓެއްގައި ޙައްޖާޖީން ރާއްޖެ އަންނައިރު މި ފްލައިޓު ސައުދި އަރަބިއްޔާގެ މަދީނާއިން ފުރާފައިވަނީ، ސައުދީ ގަޑިން 03:23 ގައެވެ. މި ފުލައިޓު ރާއްޖެއަށް ޖެއްސުމަށް ތާވަލުކޮށްފައިވަނީ، މިރޭ ދަންވަރު 12:00 އެހާކަށްހާއިރުއެވެ. މި ފުލައިޓުގައި 262 ޙައްޖާޖީން ރާއްޖެ އައުމަށް ފުރާފައިވެއެވެ.
މިއީ، ޤައުމީ އެއަރލައިންގެ ފްލައިޓެއްގައި މިއަހަރު ދިވެހި ހައްޖާޖިން އަންނަ ދެވަނަ ފުލައިޓެވެ. އަދި މިއީ ޙައްޖާޖިން ރާއްޖެ އަންނަ 4 ވަނަ އަދި ފަހު ފްލައިޓުވެސް މެއެވެ.
މި ފުލައިޓުން ފުރި ޙައްޖާޖީންނަށް ރާއްޖެ އާދެވުމާއެކު، ޙައްޖު ކޯޕަރޭޝަންގެ އެހީގައި ރާއްޖެއިން ޙައްޖަށް ދިޔަ ދިވެހި ހުރިހާ ހާޖީންނަށް ރާއްޖެއަށް އާދެވޭނެއެވެ.
ޙާޖީންގެ ކޮންމެ ގްރޫޕެއް ސައުދީގައި 3 ހަފުތާ ހޭދަކޮށްފައިވެއެވެ. މައްކާގައި ޙައްޖުގެ މަނާސިކުތަކުގެ އިތުރުން ޙާޖީން މަދީނާގައި ދެ ދުވަސް މަޑުކުރިއެވެ.