އާ އަހަރަށް މަރުހަބާ ކިޔުމަށް ހުޅުމާލޭގައި، ކުލަގަދަކޮށް ޚާއްސަ ހަރަކާތްތަކެއް ބާއްވަން ނިންމާފައިވާކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ބުނެފި އެވެ.އެމްއެމްޕީއާރްސީން ބުނީ އާ އަހަރު ފާހަގަކުރުމުގެ ހަރަކާތްތައް މި މަހުގެ 31 އަދި އަންނަ މަހުގެ އެއްވަނަ ދުވަހު ހުޅުމާލެ ސެންޓްރަލް ޕާކު ސަރަހައްދުގައި ކުރިއަށްދާނެ ކަމަށެވެ. އެގޮތުން މި ހަރަކާތްތަކުގެ ތެރެއިން ފުޑް ފެސްޓިވަލެއް މި ދެ ދުވަހު ކުރިއަށް ގެންދަން ހަމަޖެހިފައިވާއިރު، މި ފެސްޓިވަލްގެ ތެރެއިން ދިވެހި ތަފާތު އެކި ބާވަތްތަކުގެ ރަހަ ބަލާލުމުގެ ފުރުސަތު ލިބިގެންދާނެ އެވެ.މި ފެސްޓިވަލްގެ ތެރެއިން ދިވެހި ސަގާފީ އެކި ހަރަކާތްތައް ވެސް ކުރިއަށް ގެންދިޔުމަށް ހަމަޖެހިފައިވާއިރު، ބޮޑުބެރުގެ ހަރަކާތްތައް ވެސް ކުރިއަށް ގެންދަން ވަނީ ނިންމާފަ އެވެ.އާ އަހަރު ފާހަގަކުރަން ކުރިއަށްގެންދާ އެންމެ ހާއްސަ އެއް ކަމަކީ ޑްރޯން ޝޯ އެވެ. މި ޑްރޯން ޝޯ ކުރިއަށް ގެންދާނީ އެރޭގެ 9 އިން ފެށިގެން 15 މިނެޓަށް ކަމަށް އެމްއެމްޕީއާރްސީން ބުނެ އެވެ. މި ޝޯގެ ތެރެއިން ފަތުރުވެރިއަކު ރާއްޖޭގައި ކުރާ ތަޖުރިބާ ދައްކާލުމަށް ވަނީ ހަމަޖެހިފަ އެވެ.މި ހަރަކާތްތައް ހަވީރުން ފެށިގެން ދަންވަރާ ހަމައަށް، ހުޅުމާލޭ ސެންޓްރަލް ޕާކުގައި ކުރިއަށް ދާނެ އެވެ.