ޕަބްލިކް ސާވިސް މީޑިއާ (ޕީއެސްއެމް)ގެ މެނޭޖިން ޑިރެކްޓަރުގެ މަގާމުން އިބްރާހިމް ނަސްރީން (ނައްޓު) މިއަދު އިސްތިއުފާ ދެއްވައިފި އެވެ.
ތަފްސީލު - ނަސްރީން އެމްޑީގެ މަގާމުން އިސްތިއުފާ ދެއްވިކަން އެ ކުންފުނީގެ ޑެޕިއުޓީ މެނޭޖިން ޑިރެކްޓަރު އަބްދުﷲ ޔާމީން ރަޝީދު ވަނީ 'ދައުރު'އަށް ކަށަވަރުކޮށްދެއްވާފަ އެވެ.
ޔާމީން ވިދާޅުވީ ނަސްރީންގެ އިސްތިއުފާގެ ސިޓީ އެ ކުންފުންޏަށް ލިބުނީ މިއަދު ކަމަށެވެ.
"އެ ސިޓީގައި އިސްތިއުފާ ދެއްވި ސަބަބެއްގެ ގޮތުގައި ވިދާޅުވެފައި އޮތީ ސަރުކާރުގެ މިނިސްޓްރީއެއްގައި މަސައްކަތް ކުރުމުގެ ފުރުސަތު ލިބިވަޑައިގަތީމަ އެ ފުރުސަތު ބޭނުންކުރެއްވުމަށް ކަމަށް،" ޔާމީން ވިދާޅުވި އެވެ.
އެނގުން މުހިންމު - ޕީއެސްއެމްއަށް ދިގު މުއްދަތަކަށް ހިދުމަތްކުރައްވާފައިވާ ނަސްރީން، އެ ކުންފުނީގެ އެމްޑީގެ މަގާމަށް އައްޔަންކުރީ 23 ޑިސެމްބަރު 2024 ގައެވެ. އޭނާއަކީ މި ސަރުކާރުގައި ޕީއެސްއެމްއަށް އައްޔަންކުރި ތިން ވަނަ މެނޭޖިން ޑިރެކްޓަރެވެ.
އޭގެ ކުރިން ނަސްރީން ހުންނެވީ ޕީއެސްއެމްގެ ސޭލްސް އެންޑް މާކެޓިންގެ ވެރިޔަކަށެވެ.