އަތޮޅު ކައުންސިލްތައް އުވުނަސް، މުވައްޒަފުންގެ މަގާމުތަކާއި ވަޒީފާ ގެއްލޭނެ ކަމުގެ ބިރެއް ނެތް ކަމަށް ލޯކަލް ގަވަނަންސް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ. އަންނަ އަހަރު އޮންނަ ލޯކަލް ކައުންސިލް އިންތިޚާބުގެ ކުރިން، އަތޮޅު ކައުންސިލްތައް އުވާލަން ސަރުކާރުގެ ފަރާތުން ގާނޫނުއަސާސީއަށް ހުށަހެޅި އިސްލާހު ރައްޔިތުންގެ މަޖިލީހުން ވަނީ މިދިޔަ އަންގާރަ ދުވަހު ފާސްކޮށްފައެވެ. އެކަމާ ގުޅިގެން ބައެއް މީހުން އަންނަނީ، ވަޒީފާތައް ގެއްލޭނެ ކަމަށް ބުނެ، ކަންބޮޑުވުން ފާޅުކުރަމުންނެވެ. މާލެ އަތޮޅު ކައުންސިލުން އިސްނަގައިގެން ކުރިއަށްގެންދާ "ކާފު ފޯރަމް" ފެށުމަށް ރޭ ބޭއްވި ރަސްމިޔާތުގައި އެ ވާހަކައަށް މިނިސްޓަރު ވަނީ ރައްދު ދެއްވާފައެވެ. https://sun.mv/214407 ދައުލަތުގެ މީޑިއާއިން، މިނިސްޓަރާ ހަވާލާދީ ރިޕޯޓުކޮށްފައި ވަނީ، އަތޮޅު ކައުންސިލްތައް އުވާލިޔަސް، މުވައްޒަފުންގެ ވަޒީފާތަކާއި މަގާމުތައް ގެއްލޭނެ ކަމުގެ ބިރެއް ނެތް ކަމަށެވެ. މިނިސްޓަރު އާދަމް ޝަރީފް ކާފު ފޯރަމް ފެށުމުގެ ރަސްމިއްޔާތުގައި --- ފޮޓޯ/ ލޯކަލް ގަވަނަންސް މިނިސްޓްރީ އޭގެއިތުރަށް، ހުރިހާ ކައުންސިލެއްގެ އަޒުމަކަށް ވާންވީ، ލާމަރުކަޒީ ނިޒާމު ރަނގަޅުކުރުމަށް ޓަކައި މަސައްކަތް ކުރުން ކަމަށް ކަމަށް މިނިސްޓަރު ވަނީ ވިދާޅުވެފައެވެ. ފެހި ގާނޫނު އަސާސީން ލާމަރުކަޒީ ނިޒާމު ކަށަވަރުކޮށްދިނުމުގެ އަސާސް ލިބިފައިވާކަން ފާހަގަކުރައްވައި، އާދަމް ޝަރީފް ވިދާޅުވީ، ރައްޔިތުންނަށް ލިބެންޖެހޭ ބާރުވެރިކަން ފުރިހަމަ މާނައިގައި ލިބުނީ ވެސް އެހެންވެ ކަމަށެވެ. ނަމަވެސް، މި ނިޒާމު އިތުރަށް ތަރައްގީ ކުރުމަށްޓަކައި ގިނަ މަސައްކަތްތަކެއް ކުރަން ޖެހޭކަން މިނިސްޓަރު ވަނީ ފާހަގަކުރައްވާފައެވެ. މިނިސްޓަރު ވިދާޅުވީ ކައުންސިލްތަކާއެކު ރަނގަޅު ގުޅުމެއް ބާއްވައިގެން، މިނިސްޓްރީއަށް މަސައްކަތްތަކެއް ކުރެވެމުންދާ ކަމަށާއި އެ ކަމާމެދު ވަރަށް ބޮޑަށް އުފާފުޅުކުރައްވާ ކަމަށެވެ. އަތޮޅު ކައުންސިލްތައް އުވާލަން ސަރުކާރުން ވަނީ ގާނޫނުއަސާސީގެ އިތުރުން ލޯކަލް ކައުންސިލްގެ އިންތިޚާބުގެ ގާނޫނަށާއި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނެސްފައެވެ. އޭގެ ތެރެއިން ގާނޫނުއަސާސީއަށް ގެނައި އިސްލާހު ފާސްކުރީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ވެސް ވޯޓު ހިމެނޭހެން، 75 މެންބަރުންގެ ވޯޓުންނެވެ. އެ އިސްލާހު ގެންނަން ނުފެންނަ ކަމަށް ވޯޓުދެއްވީ އިދިކޮޅު އެމްޑީޕީގެ 12 މަޖިލިސް މެންބަރުން އެކަންޏެވެ. އަތޮޅު ކައުންސިލްތައް އުވާލުމުގެ އިތުރުން އާބާދީއަށް ބަލައި, ރަށްރަށުގެ ކައުންސިލްތަކުގެ ސައިޒް ކުޑަކުރައްވާނެ ކަމަށް ވެސް ރައީސް ޑރ. މުހައްމަދު މުއިއްޒު މީގެ ކުރިން ވަނީ ވިދާޅުވެފައެވެ.