އީރާނާ ދެކޮޅަށް ކުރާ ހަނގުރާމައިގެ ހަރަދުތަކަށް ގާތްގަނޑަކަށް 29 ބިލިއަން ޑޮލަރަށް އަރާފައިވާ ކަމަށް އެމެރިކާގެ ދިފާއީ ވުޒާރާ، ޕެންޓަގަންއިން އަންގާރަ ދުވަހު ބުނެފި އެވެ.
މިއާ އެކު، މި ހަނގުރާމައިގެ ސަބަބުން އެމެރިކާގެ އަސްކަރީ ތައްޔާރީ ހާލަތަށް ކުރާ ނޭދެވޭ އަސަރުތަކާ ގުޅިގެން ރައީސް ޑޮނަލްޑް ޓްރަމްޕަށް އޮތް ފާޑުކިއުންތައް ވަނީ އިތުރުވެފަ އެވެ.
ކެޕިޓަލް ހިލްގައި ބޭއްވި ބަޖެޓް އަޑުއެހުމެއްގައި ހާމަކުރި މި އަދަދަކީ، މީގެ ދެ ހަފުތާ ކުރިން ޑިފެންސް ޑިޕާޓްމަންޓުން އަންދާޒާކުރި އަދަދަށްވުރެ ހަތަރު ބިލިއަން ޑޮލަރު އިތުރު އަދަދެކެވެ.
ފެބްރުއަރީ 28 ވަނަ ދުވަހު އެމެރިކާ އާއި އިޒްރޭލުން އީރާނާ ދެކޮޅަށް ދޭން ފެށި ހަމަލާތަކަކާ ގުޅިގެން ފެށުނު ހަނގުރާމައާ ބެހޭ ގޮތުން ހެގްސެތު ވިދާޅުވީ ހަނގުރާމައިގެ ހަރަދު ބޮޑުވި ނަމަވެސް، އީރާނުން ނިއުކްލިއާ ހަތިޔާރު ހޯދައިފި ނަމަ ލިބޭނެ ގެއްލުން މިއަށްވުރެ މާ ބޮޑުވާނެ ކަމަށެވެ.
ނަމަވެސް، އީރާނުގެ ނިއުކްލިއާ ޕްރޮގްރާމް އެއްކޮށް ނައްތާލެވިފައިވާ ކަމަށް ރައީސް ޓްރަމްޕް ވިދާޅުވާއިރު، އިންޓެލިޖެންސް ރިޕޯޓްތަކުން ދައްކާ ގޮތުގައި އީރާނުން އެމެރިކާއަށް ނުރައްކާވާ ފަދަ މިސައިލެއް އުފެއްދުން އަދި އޮތީ 10 އަހަރަށް ވުރެ ވެސް ދުރުގަ އެވެ.
މިހާރު އިއުލާންކޮށްފައިވާ ހަނގުރާމަ މެދުކަނޑާލުމުގެ އެއްބަސްވުން ވަނީ ނުރައްކަލެއްގެ ތެރޭގަ އެވެ. ހަނގުރާމަ ހުއްޓާލަން އީރާނުން އެންމެ ފަހުން ހުށަހެޅި ކަންކަމަށް ވެސް ޓްރަމްޕު ވަނީ އިންކާރު ކުރައްވައިފަ އެވެ.