މެލޭޝިޔާގެ އެކި ސަރަޙައްދުތަކަށް ބޯކޮށް ވާރޭވެހި، ފެންބޮޑުވުމާ ގުޅިގެން ހިނގި ހާދިސާތަކެއްގައި ތިން މީހުން މަރުވެއްޖެއެވެ. ވިއްސާރަ މޫސުމާ ގުޅިގެން މެލޭޝިޔާގެ ގިނަ ސްޓޭޓްތަކަށް މެދުކެނޑުމެއް ނެތި ބޯކޮށް ވާރޭވެހެމުންދާއިރު، އެ ޤައުމުގެ މޫސުމާ ބެހޭ އިދާރާއިން ބުނީ ކުރިއަށް އޮތް ދުވަސްތަކުގައި ވެސް މޫސުން ގޯސްވެ، ވާރޭވެހޭނެ ކަމަށް ލަފާ ކުރެވޭ ކަމުގައެވެ.
މެލޭޝިޔާއަށް ޢާންމު ގޮތެއްގައި ވިއްސާރަ މޫސުން ލައިގަންނަނީ އޮކްޓޫބަރު މަހުން މާރިޗު މަހާ ދެމެދުގައެވެ. ފެންބޮޑުވުމާ ގުޅިގެން މެލޭޝިޔާގެ އިރުމަތީގައި އޮންނަ ހަތް ސްޓޭޓެއްގެ ގިނަ ސަރަޙައްދުތަކުގައި ފެންބޮޑުވެފައިވާ ކަމުގައި އެ ޤައުމުގެ ކަމާގުޅޭ އިދާރާތަކުން ބުންޏެވެ. އަދި، ފެންބޮޑުވުމާ ގުޅިގެން ގިނަ އަދަދެއްގެ ބަޔަކު ވަނީ އަމިއްލަ ގެދޮރުގައި ތާށިވެފައެވެ.
އެ މީހުންނަށް އެހީތެރިކަން ފޯރުކޮށްދޭން ކަމާގުޅޭ އިދާރާތަކުން މަސައްކަތް ކުރަމުންދާއިރު، މިހާތަނަށް 80,000އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ތައިލެންޑުގެ ސަރަޙައްދީ ރޮނގު ކައިރީގައި އޮންނަ ކެލަންތަން ސްޓޭޓަށެވެ. މެލޭޝިޔާގެ ކާރިސާތަކާ ބެހޭ މަރުކަޒުން ބުނީ، ފެންބޮޑުވުމާ ގުޅިގެން ހިނގި އެކި ހާދިސާތަކުގައި ތިން މީހުން މަރުވެފައިވާ ކަމުގައެވެ. އަދި، 80,589 މީހުން ރައްކާތެރި ހިސާބުތަކަށް ބަދަލު ކޮށްފައިވާ ކަމުގައެވެ.
އެ މީހުންނަށް ވަގުތީ ހިޔާވަހިކަން ހޯދައިދިނުމަށް ސަރުކާރުން ވަނީ 467 ވަގުތީ ހިޔާއެއް ހަމަޖައްސާފައެވެ. ކެލަންތާނާ އިންވެގެން އޮތް ތެރެންގާނޫގައި ވެސް ގިނަ އަދަދެއްގެ ބަޔަކު ހާލުގައި ޖެހިފައިވާ ކަމަށާއި، އެ ސްޓޭޓުން ވެސް ގިނަ އަދަދެއްގެ ބަޔަކު ރައްކާތެރި ހިސާބުތަކަށް ބަދަލު ކޮށްފައިވާ ކަމުގައި ކާރިސާތަކާ ބެހޭ މަރުކަޒުން ބުންޏެވެ. މީގެ އިތުރުން ކެޑަހް، ޕަރްލިސް، ޖޮހޯ އަދި ޕޭރާކުގެ ބޮޑު ސަރަޙައްދެއްގައި ވެސް ވަނީ ފެންބޮޑުވެފައެވެ.
މެލޭޝިޔާގެ ބޮޑުވަޒީރުގެ ނައިބު އަޙްމަދު ޒާހިދު ޙަމީދީ ވިދާޅުވީ، 2014ވަނަ އަހަރު އެ ޤައުމުގެ ސަރަޙައްދުތަކަށް ކުރި ވިއްސާރައާ ގުޅިގެން ކުރިމަތިވި ހާލަތަށް ވުރެ ނުރައްކާތެރި ހާލަތެއް މި އަހަރު ކުރިމަތިވެދާނެ ކަމަށް ބެލެވޭ ކަމުގައެވެ. އެ އަހަރު ފެންބޮޑުވުމާ ގުޅިގެން 250,000އަށްވުރެ ގިނަ މީހުންގެ ގެދޮރަށް ފެންވަދެ، ހާލުގައި ޖެހުނެވެ. އަދި، ރައްކާތެރި ހިސާބުތަކަށް ބަދަލު ކުރަން ޖެހުނެވެ.
"ހާލަތު ގޯސްވެފައިވާ މިންވަރަށް ބަލައި، ހާލުގައި ޖެހިފައިވާ ރައްޔިތުން ސަލާމަތްކޮށް، އެހީތެރިކަން ފޯރުކޮށްދިނުމަށް ކަމާގުޅޭ ހުރިހާ އިދާރާއަކާއި ވަަސީލަތްތައް ވާނީ ރުކުރުވައިލާފައި،" އޭނާ ވިދާޅުވިއެވެ. މެލޭޝިޔާގެ ދައުލަތުގެ މީޑިޔާ، ބަރްނާމާން ބުނީ ގެދޮރުގައި ތާށިވެފައިވާ މީހުން ސަލާމަތްކޮށް، ރައްކާތެރި ހިސާބުތަކަށް ބަދަލު ކުރުމަށާއި، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އެ ޤައުމުގެ ސަލާާމަތީ ބާރުގެ 82,000އަށްވުރެ ގިނަ ސިފައިން ހަރަކާތްތެރިވަމުންދާ ކަމުގައެވެ.
މެލޭޝިޔާގެ އިރުމަތީ ސަރަޙައްދުތަކުގައި ފެންބޮޑުވުމާ ގުޅިގެން، އެ ސަރަޙައްދުތަކުގައި ރޭލު ދަތުރުފަތުރުގެ ޚިދުމަތްތައް ވެސް ވަނީ މެދުކަނޑައިލާފައެވެ. އެ ޤައުމުގެ މޫސުމާ ބެހޭ އިދާރާއިން ބުނީ، އެ ސަރަޙައްދުތަކަށް ވިއްސާރަ އަލިވާނެ ކަަަމަށް ބެލެވެނީ ނޮވެންބަރު 29ވަނަ ދުވަހުގެ ފަހުން ކަމުގައެވެ. ނަމަވެސް، ޑިސެންބަރު 1ވަނަ ދުވަހާ ޖެހެންދެން އިރުމަތީ ގިނަ ސަރަޙައްދުތަކަށް މޫސުން ގޯސްވާނެ ކަމަށް ލަފާކުރެވޭ ކަމުގައި ވެސް އެ އިދާރާއިން އިންޒާރު ކުރިއެވެ.
ވިއްސާރަ މޫސުމުގައި، މެދުކެނޑުމެއް ނެތި ބޯކޮށް ވާރޭވެހުމާ ގުޅިގެން މެލޭޝިޔާގެ އިރުމަތީ އައްސޭރިފަށުގެ ސަރަޙައްދުތަކުގައި ފެންބޮޑުވުމަކީ ޢާންމު ކަމެކެވެ. ފެންބޮޑުވުމާ ގުޅިގެން ކޮންމެ އަހަރަކު ވެސް ގިނަ އަދަދެއްގެ ބަޔެއްގެ ގެދޮރަށް ގެއްލުންވެ، ހާލުގައި ޖެހެއެވެ.