ސްރީ ލަންކާއަށް މިހާރު ކުރަމުންދާ ވިއްސާރައިގައި މަރުވި މީހުންގެ އަދަދު 132 އުފުލިއްޖެއެވެ. ބޯކޮށް ވާރޭވެހި ބިންގަނޑު ކަނޑައިގެން ދިއުމުގެ ސަބަބުން ހިނގި ހާދިސާތަކުގައި 176 މީހުން ވީނުވީއެއް ނޭގި ގެއްލިފައިވާ ކަމަށް ލަންކާ ޑިޒާސްޓާ މެނޭޖްމަންޓް (ޑީއެމްސީ)އިން ބުނެއެވެ. ގެއްލުން ލިބުނު ސަރަހައްދުތަކުން މީހުން ސަލާމަތްކުރުމާއި އެހީ ފޯރުކޮށްދިނުމުގެ މަސައްކަތްތައް ކުރިއަށްދާއިރު، މަރުވި މީހުންނާއި ގެއްލުނު މީހުންގެ އަދަދު އިތުރުވެދާނެ ކަމަށް ކަމާބެހޭ ފަރާތްތަކުން ބުނެއެވެ. ރެސްކިއު ޓީމުތަކަށް ފެންބޮޑުވެ، ބިންގަނޑު ކަނޑައިގެން ގޮސްފައިވާ ބައެއް ސަރަހައްދުތަކަށް ދިއުމަށް ވަނީ ދަތިވެފައެވެ. ބައެއް ސަރަހައްދުތަކަށް ވޭތުވެދިޔަ 24 ގަޑިއިރު ތެރޭގައި 360 މިލިމީޓަރުގެ ވާރޭ ވެހިފައިވާ ކަމަށް ލަންކާގެ ޑިޒާސްޓާ މެނޭޖްމަންޓް ސެންޓަރު، ޑީއެމްސީން ބުންޏެވެ. ވެރިރަށް ކޮލަމްބޯ ކައިރީގައި އޮންނަ ކެލާނީ ކޯރުގެ ފެންގަނޑު ވެސް އިއްޔެ ވަރަށް ބޮޑަށް އުފުލިފައިވާ ކަމަށް ޑީއެމްސީއިން ބުނެފައިވެއެވެ. ބިންގަނޑު ކަނޑައިގެން ދިއުމުގެ ސަބަބުން އެ ގައުމުގެ މެދުތެރެއިން ރޭ އެކަނިވެސް 21 މީހުން ވަނީ މަރުވެފައެވެ. ފެންބޮޑުވުމުގެ ސަބަބުން 3،000 ގެއަށް ގެއްލުން ލިބިފައިވާއިރު، 18،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ބަދަލުކޮށްފައެވެ. ޑީއެމްސީން ބުނީ ކުރިއަށް ދުވަސްތަކުގައި ވެސް ވާރޭ ވެހޭނެ ކަމަށް ލަފާކުރެވޭ ކަމަށެވެ. ބޭ އޮފް ބެންގާލްގެ ހުޅަނގުން ލަންކާ ކައިރިން އުފެދިފައިވާ ތޫފާން "ދީތްވާ" މާދަމާގެ ވަގުތެއްގައި އިންޑިއާގެ ޓަމިލް ނާޑޫއަށް އަރާނެ ކަމަށްވެސް ލަފާކޮށްފައިވެއެވެ. ޑީއެމްސީގެ އޮފިޝަލުން ވިދާޅުވި ގޮތުގައި 2016 ވަނަ އަހަރު ހިނގި ފެންބޮޑުވުމުގެ ހާދިސާއަށްވުރެ މިހާރު ކުރަމުންދާ ވިއްސާރައިގައި ފެންބޮޑުވާނެ މިންވަރު އިތުރުވާނެއެވެ. އެ ހާދިސާގައި މުޅި ލަންކާއިން 71 މީހުން މަރުވިއެވެ. ހައިވޭތައް ބަންދުކޮށްފައިވާއިރު، ބައެއް ސަރަހައްދުތަކުގެ ރޭލު ދަތުރުތަކަށް ވަނީ ވަރަށް ބޮޑަށް އަސަރުކޮށްފައެވެ. މިއީ ލަންކާއަށް އާންމުކޮށް ވިއްސާރަކުރާ ދުވަސްވަރެއް ނަމަވެސް މިހާރު ވިއްސާރަ ކުރަމުންދަނީ ވަރަށް ބޮޑަށެވެ. މި ގަރުނުގައި ލަންކާގައި އެންމެ ބޮޑަށް ފެންބޮޑުވެފައިވަނީ 2003 ވަނަ އަހަރުގެ ޖޫން މަހުއެވެ. އެ ފަހަރު ފެންބޮޑުވުމުގެ ސަބަބުން 254 މީހުން މަރުވެ، ލައްކައެއްހާ މީހުންގެ ގެދޮރު ގެއްލުނެވެ. މި ދުވަސްވަރު ރާއްޖެއަށްވެސް އަންނަނީ ވިއްސާރަ ކުރަމުންނެވެ. ރާއްޖޭގެ މޫސުމާބެހޭ ގައުމީ އިދާރާއިން ހާމަކޮށްފައިވާ ގޮތުގައި މި ހަފުތާގައި ރާއްޖޭގެ އެކި ހިސާބުތަކަށް ވިއްސާރަކޮށް، ގުގުރުމާ އެކު ވައިގަދަވުން އެކަށީގެންވެއެވެ.