ހުސްވެފައިވާ އެމްޑީޕީގެ ޗެއާޕާސަންގެ މަގާމަށް ކުރިމަތިލާން، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ނިންމަވައިފި އެވެ.
ބުނީ ކީކޭ؟ - މީކާއިލް އެކަން އިއުލާންކުރެއްވީ މިރޭ 'އެކްސް'ގައި ކުރެއްވި ޕޯސްޓެއްގަ އެވެ.
"ކުރިއަށް އޮތް އެމްޑީޕީގެ ޗެއާޕާސަންގެ އިންތިހާބުގައި ވާދަކުރުމަށް ނިންމައިފިން. މި ޕާޓީގެ ލީޑަޝިޕުން އާ ޖީލަކަށް ފުރުސަތު ހޯދުމުގެ މި މުހިންމު މަސައްކަތުގައި އެމްޑީޕީގެ އާންމު މެމްބަރުންގެ އެއްބާރުލުމާއި ތާއީދަށް އެދެން،" މީކާއިލް ވިދާޅުވި އެވެ.
ތަފްސީލު - އެމްޑީޕީގެ ޗެއާޕާސަންގެ މަގާމު ހުސްވީ، އެ މަގާމުގައި ހުންނެވި ފައްޔާޒް އިސްމާއިލް މިދިޔަ އާދީއްތަ ދުވަހު ކުއްލި ގޮތަކަށް އެ މަގާމުން އިސްތިއުފާ ދެއްވުމުންނެވެ.
ވަގުތީ ޗެއާޕާސަނެއް ހޮވަން އެމްޑީޕީއިން ރޭ ބައްދަލުވުމެއް ބޭއްވި ނަމަވެސް، އެ ބައްދަލުވުން ހޫނުވެ، ޗެެއާޕާސަނެއް ވެސް ނުހޮވި ވަނީ ނިންމާލާފަ އެވެ.
އެ މަގާމަށް ވަގުތީ ގޮތުން ކުރިމަތިލުމަށް ހުޅުވާލުމުން، ތިން ނަމެއް ހުށަހަޅަން ނިންމައި ޝައުގުވެރިކަން ފާޅުކުރި އެވެ. އެއީ:
ރައްޔިތުންގެ މަޖިލީހުގެ ކުރީގެ ރައީސް މުހައްމަދު އަސްލަމް 
ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ
ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު
އެކަމަކު އޭގެތެރެއިން ހުށަހެޅީ، ވަހީދުގެ ނަން އެކަންޏެވެ. 
އޭނާގެ ނަން ހުށަހަޅައި ވޯޓަށް އެހުމާއެކު، ހާޒިރުވި 96 މެންބަރުންގެ ތެރެއިން 47 މީހުންގެ ތާއީދު ލިބުނެވެ. އެކަމަކު ރިޔާސަތުން ބުނީ މަގާމަށް އައްޔަން ކުރާ ވަރަށް ވޯޓު ނުލިބޭ ކަމަށެވެ. އެއާއެކު ބައްދަލުވުން އަޑުގަދަވި އެވެ. ބައެއް މީހުން ގޮވާލީ، އެ މަގާމަށް އޭނާ ހޮވިފައިވާ ކަމަށެވެ.