ށ. ކޮމަންޑޫއަށް ބޭނުންވާ އެމްބިއުލެންސް އެރަށަށް ފޮނުވައިފިއެވެ.
ހެލްތް މިނިސްޓްރީން ބުނެފައިވަނީ އަތޮޅުތެރޭގައި ބޭނުންކުރުމަށް އެސް.ޓީ.އޯ މެދުވެރިކޮށް ގެނެވިފައިވާ އެމްބިއުލެންސް ގެ ތެރެއިން ށ.ކޮމަންޑޫ އަށް ފޮނުވާ އެމްބިއުލެންސް ރޭ ފޮނުވާލާފައިވާކަމަށެވެ.
އަތޮޅުތެރޭގައި ބޭނުންކުރުމަށް އެސް.ޓީ.އޯ މެދުވެރިކޮށް ގެނެވިފައިވާ އެމްބިއުލެންސް ގެ ތެރެއިން ށ.ކޮމަންޑޫ އަށް ފޮނުވާ އެމްބިއުލެންސް ވަނީ މިރޭ ފޮނުވާލެވިފައި. pic.twitter.com/bj7VHcWy7Y
— Ministry of Health (@MoHmv) January 24, 2022
ކޮމަންޑޫއަށް އެމްބިއުލެންސް ފޮނުވާފައިމިވަނީ އެ ދާއިރާގެ މަޖިލީހުގެ ބައި އިލެކްޝަން ބޭއްވުމަށް 10 ވަރަކަށް ދުވަހަށް ކައިރިވެފައިވަނިކޮށެވެ.
ސަރުކާރުން މިދުވަސްވަރު އަންނަނީ ކޮމަންޑޫ ދާއިރާގެ ގިނަ މަސައްކަތްތަކެއް ކުރަމުންނެވެ. އޭގެތެރެއިންވެސް އެންމެ ފާހަގަކުރެވެނީ އިންތިހާބާ ދިމާކޮށް ހަވާލުކުރެވުނު ކޮމަންޑު އަދި މަތިކޮމަންޑޫ ގުޅުވާލުމުގެ މަޝްރޫއެވެ.
މިދުވަސްވަރު އިންތިހާބާ ދިމާކޮށް ކޮމަންޑު ދާއިރާގައި މަޝްރޫއުތައް ހިންގަމުން އަންނާތީ ޓްރާންސްޕޭރެންސީ މޯލްޑިވްސްއާއި ސަރުކާރު ކޯލިޝަންގައި ހިމެނޭ އެމްއާރްއެމްއިން ވަނީ އިންތިހާބަށް ނުފޫޒު ފޯރުވޭފަދަ ކަންކަން ނުކުރުމަށް ގޮވާލާފައެވެ.
ކޮމަންޑޫ ދާއިރާގެ އިންތިހާބުގައި ވާދަކުރައްވަނީ ތިން ކެންޑިޑޭޓުންނެވެ. އެއީ ޕީޕީއެމްގެ ފަރާތުން މޫސާ ފަތުހީ އާއި އެމްޑީޕީގެ ފަރާތުން މުހައްމަދު ރާޝިދުގެ އިތުރުން އެމްއެންޕީގެ ފަރާތުން އަބްދުލްހަންނާން އިދުރީސްއެވެ. ބައި އިލެކްޝަން ބޭއްވުމަށް ހަމަޖެހިފައިވަނީ އަންނަ ފެބްރުއަރީ މަހުގެ ފަސްވަނަ ދުވަހުއެވެ.