ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ) ގެ އެތެރޭގެ އިންތިހާބުގެ ވޯޓުލުން މިއަދު ހެނދުނު 10 އިން 2 އަކަށް ކުރިއަށް ގެންގޮސްފައި ވާއިރު، ތ. ކަނޑޫދޫގެ ވޯޓު ފޮށި ފަޅާލާ ބޮޑު ހަމަނުޖެހުމެއް ހިންގައިފިއެވެ.
މި ހަމަނުޖެހުން ހިންގާފައިވާ ވީޑިއޯ މިހާރު ސޯޝަލް މީޑިއާގައި ދައުރުވަމުން ދާއިރު ވީޑިއޯ އިން ފެންނަ ގޮތުގައި ވޯޓު ފޮށި ކައިރީގައި ދެމީހަކު ވަނީ ހަމަނުޖެހުމެއް ހިންގާފައެވެ. އެތަނުން އެކަކު ގޮނޑިއެއްގެ މައްޗަށް ވައްޓާލާފައި ވާއިރު ކައިރީގައި ތިބި މީހުން އެ ދެމީހުން ދުރުކުރަން މަސައްކަތް ކުރާތަން ވީޑިއޯ އިން ފެނެއެވެ. އަދި ވޯޓު ފޮށިވެސް އެ ތަނުން އެވަގުތު ދުރުކުރި މަންޒަރު ވީޑިއޯއިން ފެނެއެވެ.
މިކަމާ ގުޅިގެން ކަނޑޫދޫގެ ކައުންސިލްގެ ބަހެއް ހޯދުމަށް "ދަ ޕްރެސް" އިން މަސައްކަތް ކުރި ނަމަވެސް އަދި ވަނީ ލިބޭގޮތް ނުވެފައެވެ.
ޕީއެންސީ އިންތިހާބުގެ ވޯޓުލުން ވަނީ ގއ، ގދ، ލ، ތ، މ، ދ، އއ، ކ، ބ، ރ، ނ، ޅ، ށ، އދ، ސ، ޏ، ހއ އަދި ހދ އަތޮޅުގެ ރަށްތަކުގައި ކުރިއަށް ގެންގޮސްފައެވެ. ޕީއެންސީ އިން ބުނީ ޖުމްލަ 143 ވޯޓު ފޮއްޓެއް ބަހައްޓާފައި ވާކަމަށާއި، މާލެ ހިމެނޭހެން ޖުމުލަ 90 ރަށެއްގައި ވޯޓުލުން ކުރިއަށް ގެންގޮސްފައިވާ ކަމަށެވެ.
667 ކެންޑިޑޭޓުން މި އިންތިހާބުގައި ވާދަކޮށްފައި ވާއިރު އެ ޕާޓީ އިން ބުނީ އެ ޕާޓީގެ އެތެރޭގެ 59 ދާއިރާއަކަށް މެމްބަރުން އިންތިހާބު ކުރާނެ ކަމަށެވެ. ޕީއެންސީން ކުރިމަތިލި ކެންޑިޑޭޓުންގެ ނަންތައް ތަރުތީބުކޮށް ލިސްޓުތައް އާންމުކޮށްފައި ވާއިރު، ޖުމްލަ 91 ދާއިރާއެއްގެ ތެރެއިން ލިސްޓުގައި ވާގޮތުން 32 ދާއިރާއެއްގެ މަގާމުތަކަށް އެއްވެސް އިންތިހާބެއް ނެތި މެންބަރުން ވަނީ ހޮވިފައެވެ.
މި އިންތިހާބުގައި ވޯޓު ލުމުގެ ހައްގު 34،904 ފަރާތަކަށް ލިބިގެން ވާކަމަށް ވެސް ޕީއެންސީ އިން ވަނީ ބުނެފައެވެ.
ޕީއެންސީގެ އެތެރޭގެ އިންތިހާބު ބާއްވާނެކަން އެ ޕާޓީގެ ފަރާތުން އިއުލާން ކުރީ މިދިޔަ ސެޕްޓެމްބަރު މަހުގައެވެ. އެގޮތުން އެންމެ ފުރަތަމަ އެ ޕާޓީ އިން އިއުލާން ކުރީ އެ ޕާޓީގެ އެތެރޭގެ އިންތިހާބު މިދިޔަ މަހުގެ 19 ވަނަ ދުވަހު ބާއްވާ ގޮތަށެވެ. ނަމަވެސް މި ތާރީހު ވަނީ ދެފަހަރެއްގެ މަތިން ފަސްކޮށްފައެވެ.