ދިވެހީން އާ ވިޔަފާރިތަކަށް ވަނުމަށް ހުރި ހުރަސްތައް މަދުކުރުމަށް މި ސަރުކާރުން ފިޔަވަޅުތައް އަޅަމުން އަންނަ ކަމަށް ފިނޭންސް މިނިސްޓަރު މޫސާ ޒަމީރު ރޭ ވިދާޅުވެއްޖެއެވެ. އެންމެ ކުދި، ކުދި އަދި މެދުފަންތީގެ ވިޔަފާރިތަކަށް އެވޯޑު ދިނުމަށް ބޭއްވި ހަފުލާގައި ޒަމީރު ވިދާޅުވީ، އެފަދަ ވިޔަފާރިތައް ހަރުދަނާ ކުރުމަކީ މި ސަރުކާރުގެ އިގުތިސާދީ އެޖެންޑާގެ މުހިންމު އެއް އަމާޒު ކަމަށެވެ. އެގޮތުން ހުރިހާ އަތޮޅުތަކާއި ރަށްރަށުގައި ވިޔަފާރިތައް ހަރުދަނާ ކުރަން ޖެހޭކަން އޭނާ ފާހަގަކުރެއްވިއެވެ. އެހެންވެ، މާލީ ޚިދުމަތްތައް ފަސޭހައިން ލިބޭނެ ވަސީލަތްތައް ގާއިމުކޮށް، މާކެޓްތަކާ ގުޅުން ބަދަހިކުރުމާއި ޑިޖިޓަލް ކުރުން ކުރިއެރުވުމާއި އާ ވިޔަފާރިތަކަަށް ވަނުމަށް ހުރި ހުރަސްތައް މަދުކުރުމަށް މި ސަރުކާރުން އަންނަނީ މަސައްކަތް ކުރަމުން ކަމަށް ޒަމީރު ވިދާޅުވިއެވެ. "ވިޔަފާރިތައް ރަސްމީ ކުރުމާއި، ލޯނު ހޯދުމާއި ޑިޖިޓަލްކޮށް ފައިސާ ދެއްކުމާއި ރާއްޖެތެރޭގައިއާއި ބޭރުގައި ވެސް އާ މާކެޓްތަކާ ގުޅުން ބަދަހިކުރުމަށް އަޅުގަނޑުމެން މަސައްކަތް ކުރަން ޖެހޭ. މި މަސައްކަތުގައި ބިޒްނަސް ސެންޓާ ކޯޕަރޭޝަން ފަދަ މުއައްސަސާތަކަކީ ވަރަށް މުހިންމު ބައިވެރިއެއް،" އޭނާ ވިދާޅުވިއެވެ. ބީސީސީއާއި އެހެނިހެން އިދާރާތަކުން ފަންނީ އަދި މާލީ އެހީތެރިކަން ފޯރުކޮށްދީ، ވިޔަފާރިތަކުގެ އުފެއްދުންތައް ދައްކާލުމަށް ފުރުސަތު ދީގެން، އެ ވިޔަފާރިތަކަށް އެހީވަމުން އަންނަ ކަމަށް ވެސް ޒަމީރު ވިދާޅުވިއެވެ. ފިނޭންސް މިނިސްޓަރު މޫސާ ޒަމީރު: ދިވެހީން އާ ވިޔަފާރިތަކަށް ވަނުމަށް ހުރި ހުރަސްތައް މަދުކުރަން އަންނަނީ މަސައްކަތްކުރަމުން އަންނަ ކަމަށް ޒަމީރު ވިދާޅުވި --- ފޮޓޯ/ ޒަމީރު އިތުރަށް މިނިސްޓަރު ވިދާޅުވީ، ރައީސް ޑރ. މުޙައްމަދުގެ އިރުޝާދުގެ ދަށުން ދައުލަތުގެ މާލިއްޔަތު ތަރުތީބުކުރުމާއި އިގުތިޞާދީ ކުރިއެރުމަށް ދެމެހެއްޓެނިވި ބިންގަލެއް އެޅުމުގެ މަސައްކަތް ފިނޭންސް މިނިސްޓްރީން ކުރަމުން އަންނަ ކަމަށެވެ. އޭނާ ވިދާޅުވީ ދައުލަތުގެ ޚަރަދުތައް ހުރީ މި އަހަރަށް ފާސްކުރި ބަޖެޓުގެ ތެރޭގައި ހިފެހެއްޓިފައި ކަމަށާއި ޖެހިޖެހިގެން 40 ހަފުތާ ވަންދެން ބަޖެޓުގެ ސާޕްލަސްގައި ހިފެހެއްޓުނު ކަމަށެވެ. އިގުތިޞާދީ އެ ކަންކަން ހާސިލުކޮށްފައި ވަނީ، ކޭޝް ފްލޯ މެނޭޖުމަންޓު ވަރުގަދަކޮށް، އިސްރާފު ކުރުމާއި ބޭކާރު ދަތުރުފަތުރާއި މަރާމާތުގެ ހޭދަތައް ކުޑަކޮށްގެން ކަމަށް ފިނޭންސް މިނިސްޓަރު ވިދާޅުވިއެވެ. ފިނޭންސް މިނިސްޓަރާއި އިކޮނޮމިކް މިނިސްޓަރު ----- ފޮޓޯ/ މިނިސްޓަރު ސައީދު އޭގެއިތުރަށް، ސޮވެރިން ޑިވެލޮޕްމަންޓް ފަންޑުގައި ހުރި ނަގުދު ފައިސާ 100 މިލިއަން ޑޮލަރަށް ވުރެ އިތުރުވެފައިވާ ކަމަށާއި އެ މިންވަރަށް އިތުރުވީ ފުރަތަމަ ފަހަރަށް ކަން މިނިސްޓަރު ފާހަގަކުރެއްވިއެވެ. އެއީ، މުސްތަގުބަލުގައި ދިމާވެދާނެ ކާރިސާތަކުން ސަލާމަތްވުމަށް ވަރަށް މުހިންމު ކަމެއްގެ ގޮތުގައި ޒަމީރު ސިފަކުރެއްވިއެވެ. https://sun.mv/214594 އެމްއެސްއެމްއީއަށް ޚާއްސަކޮށް ބޭއްވި އެވޯޑު ހަފުލާގައި 21 ވިޔަފާރިއަކަށް ރޭ އެވޯޑުތައް ދީފިއައިވެއެވެ. ބީސީސީއާއި އިކޮނޮމިކް މިނިސްޓްރީ ގުޅިގެން ދޭ އެ އެވޯޑަކީ، ރާއްޖޭގައި ހަރަކާތްތެރިވާ އެންމެ ކުދި، ކުދި އަދި މެދު ފަންތީގެ ވިޔަފާރިތަކުން ހޯދަމުން އަންނަ ކާމިޔާބީތައް ފާހަގަކޮށް، ހިތްވަރު ދިނުމުގެ ގޮތުން ދޭ އެވޯޑްތަކެއް ކަމަށް ބީސީސީން ބުނެފައިވެއެވެ.