ރައީސް މުހައްމަދު މުއިއްޒު ކަނޑައެޅި ޑޮލަރު މާރުކުރަން މަޖުބޫރުކުރުމުގެ ސިޔާސަތާ ގުޅިގެން ޓްރާންސް މޯލްޑިވިއަން އެއާވޭސް (ޓީއެމްއޭ) އަށް ޑޮލަރުގެ ތާށިކަން ބޮޑުވެ، މުވައްޒަފުންނަށް ރުފިޔާއިން މުސާރަ ދޭން ނިންމުމާ ގުޅިގެން، ޕައިލެޓުން ހިމެނޭހެން އެ ކުންފުނީގެ ހުރިހާ މުވައްޒަފުން ހަޅުތާލު ކުރަން ނިންމައިފި ކަމަށް އިއްޔެ ރިޕޯޓުކުރި އެވެ.
ސަރުކާރުން ތަންފީޒުކުރަން ފެށި ޑޮލަރުގެ ސިޔާސަތާ ގުޅިގެން 20 ޕަސެންޓު ޑޮލަރު މާރުކުރަން މަޖުބޫރުވާތީ، ޓީއެމްއޭއިން އެމްއޭސީއެލްއަށް ދައްކާ ބިމު ކުއްޔާއި ތެލުގެ އަގު ރުފިޔާއިން ގަބޫލު ކުރަން އެދުނު ކަމަށް، އެ މައުލޫމާތު އެނގޭ ބައެއް މީހުން ބުންޏެވެ.
ނަމަވެސް ސަރުކާރުން އެ ހުށަހެޅުން ބަލައިނުގަތެވެ. އެކަމުގެ ނަތީޖާއަކީ މުވައްޒަފުންނަށް ރުފިޔާއިން މުސާރަ ދޭން މަޖުބޫރުވުން ކަމަށް ނަން ނުޖެހުމަށް ޝަރުތުކޮށް ޓީއެމްއޭގެ ސީނިއާ އޮފިޝަލަކު ބުންޏެވެ.
އަދަދު ނޫހާ ވާހަކަ ދެއްކި ޓީއެމްއޭގެ ބައެއް މުވައްޒަފުން ބުނީ އެ ކުންފުނިން އެއްބަސްވުން ހަދާފައި ވަނީ ޑޮލަރުން މުސާރަ ދޭ ގޮތަށް ކަމަށެވެ. މުސާރަ ރުފިޔާއަށް ބަދަލުކޮށްފި ނަމަ، އެއީ ޑޮލަރުގެ ރޭޓު މިހާރު ހުރި ވަރުން ނަމަ ބޮޑު ގެއްލުމެއް ކަމަށް މުވައްޒަފުން ގަބޫލު ކުރެ އެވެ.
"ބާރަ ހާސް ޑޮލަރުގެ މުސާރަ ލިބޭ ޕައިލެޓަކަށް ރުފިޔާއިން މުސާރަ ދޭނަމަ، 54،000ރ. ގެ ގެއްލުމެއް ލިބޭނެ،" އޭނާ ބުންޏެވެ.
ފަސްދޮޅުހަށްް ވުރެ ގިނަ ސީޕްލޭން އޮޕަރޭޓުކުރާ ޓީއެމްއޭގައި 1500 އަށް ވުރެ ގިނަ މުވައްޒަފުން އުޅެ އެވެ.
އެ މީހުންނަށް މުސާރަ ރުފިޔާއަށް ދޭން ޖެހިދާނެ ކަމަށް ބުނެ ޓީއެމްއޭގެ މެނޭޖުމެންޓުން މުވައްޒަފުންނަށް ފުރަތަމަ ސިޓީއެއް ފޮނުވީ މިދިޔަ ޖޫން 22، ވަނަ ދުވަހު އެވެ. އެއަށް ފަހު ޖޫން 30، ގައި ވެސް އެ މައުލޫއުގައި ސިޓީއެއް ފޮނުވި އެވެ.
މި މަހުގެ މުސާރަ ދޭއިރު، ރުފިޔާއިން މުސާރަ ދީފި ނަމަ އިހުތިޖާޖު ކުރަން ޓީއެމްއޭގެ މުވައްޒަފުން ތައްޔާރު ކަމަށް ބައެއް މުވައްޒަފުން ބުންޏެވެ. ޕައިލެޓުންނާއި މުވައްޒަފުންގެ ޑިމާންޑާ އެއްގޮތަށް ޓީއެމްއޭގެ މެނޭޖުމެންޓުން އަމަލު ނުކޮށްފި ނަމަ މި މަހުގެ 29 ގައި އުދުހުން ހުއްޓާލަން ދަނީ ރާވަމުންނެވެ.
ޓީއެމްއޭގެ އޮޕަރޭޝަނަށް ބުރޫ އަރުވާލައިފި ނަމަ ރާއްޖޭގެ ޓޫރިޒަމަށް ބޮޑު ގެއްލުމެއް ކުރިމަތިވާނެ އެވެ. ސަބަބަކީ ފްލައިޓުތައް އުދުހުން ހުއްޓާލައިފި ނަމަ ރިސޯޓުތަކަށް ޓޫރިސްޓުން ގެންދިޔުމަށް ދަތިވާނެތީ އެވެ.
"މިއީ ރާއްޖޭގެ ޓޫރިޒަމަށް، އަދި ބްރޭންޑަށް ވެސް ބޮޑު ގެއްލުމެއް،" މި ނޫހާ ވާހަކަ ދެއްކި މީހަކު، ނަން ނުޖެހުމަށް ޝަރުތުކޮށް ބުންޏެވެ.
ޓީއެމްއޭގެ ޕައިލެޓުން އިއްޔެ ރޭ ވަނީ ބައްދަލުވުމެއް ބާއްވައި، ރުފިޔާއިން މުސާރަ ދޭން މެނޭޖްމަންޓުން ނިންމާފައި އޮތް ނިންމުމާ ގުޅޭ ގޮތުން މަޝްވަރާތަކެއް ކޮށްފަ އެވެ.
މި ނޫހަށް އެނގިފައިވާ ގޮތުގައި ޓީއެމްއޭގެ މުވައްޒަފުންނަށް މުސާރަ ދިނުމަށް ބޭންކަށް ފޮނުވާނީ މާދަމާ އެވެ. ނަމަވެސް މުސާރަ ދޭން މެނޭޖްމަންޓުން ނިންމާފައި ވަނީ ޑޮލަރުން ކަމެއް މިހާތަނަށް ޔަގީނެއް ނުވެ އެވެ.
ސަރުކާރުން ޑޮލަރުގެ މައްސަލަ ހައްލުކުރަން އެޅި ފިޔަވަޅުތަކާއެކު ޑޮލަރުގެ ތާށިކަން އިތުރުވެ، ކަޅު ބާޒާރުގައި ޑޮލަރުގެ އަގު މިހާރު ހުރީ 20.20ރ. ގަ އެވެ. މި އަގަށް ވެސް ރާއްޖެއިން ބޭރުން މުދާ ގަންނަން ބޭނުންވާ ޑޮލަރު ނުލިބިގެން ވިޔަފާރިވެރިން ދަނީ ކަންބޮޑުވުން ފާޅުކުރަމުންނެވެ.
- އެކި ހިސާބުތަކަށް ވިއްސާރަކުރާނެ. ބައެއް ރަށްތަކަށް ބޯކޮށް ވާރޭ ވެހި ގުގުރުން އެކަށީގެންވޭ.
- ވައިޖެހޭނީ ހުޅަނގު ދެކުނާއި ހުޅަނގުން ދެކުނުގެ އަތޮޅުތަކަށް ގަޑިއަކު 10 މޭލާއި 20 މޭލަށް. އެހެން ހިސާބުތަކަށް ގަޑިއަކު 15 މޭލާއި 25 މޭލަށް. ވިލާގަނޑުގައި 45-50 މޭލަށް ވައި ބާރުވާނެ.
- ކަނޑުތައް ގަދަވާނެ.
- ރާޅުގެ އުސްމިން ހުރީ 4 ފޫޓާއި 7 ފޫޓަށް