ނިދާ ކޮޓަރީގައި، ކުރުނބާ ފަނި ގިރައި، ފިހާރަތަކަށް ކުރުނބާ ފަނި ފުޅި، ޑެލިވަރީ ކުރަމުން ދިޔަ ދެ ބިދޭސީން އިމިގްރޭޝަންގެ ބެލުމުގެ ދަށަށް އިއްޔެ ގެނެސްފިއެވެ. އިމިގްރޭޝަނުގެ ބެލުމުގެ ދަށަށް ގެންގޮސްފައި ވަނީ، ބަންގްލަދޭޝަށް ނިސްބަތްވާ ދެ ފިރިހެނުންނެވެ. ފުލުހުން ބުނީ، އެ މީހުން އިމިގްރޭޝަނުގެ ބެލުމުގެ ދަށަށް ގެނައީ، އިއްޔެ ހިންގި އޮޕަރޭޝަނެއްގައި ބިދޭސީން ދިރިއުޅޭ ތަނެއް ބަލައި ފާސްކުރުމަށް ފަހުގައި ކަމަށެވެ. އެގޮތުން، އެތަނުން ގިނަ އަދަދެއްގެ ކުރުނބާއާއި ހުސް ފުޅި ފެނުނު ކަމަށާއި އެ ތަނަކީ، ކުރުނބާއާއި ކުރުނބާ ފަނި ހަދައިގެން ފިހާރަތަކަށް ޑެލިވަރީކޮށްދޭ ތަނެއްކަން ފާހަގަވެފައިވާ ކަމަށް ފުލުހުން ބުނެއެވެ. އިމިގްރޭޝަނާ ފުލުހުން ގުޅިގެން ހިންގި އޮޕަރޭޝަނުގައި ހިފެހެއްޓި ބިދޭސީން ދިރިއުޅޭ ތަން ---- ފޮޓޯ/ ފުލުހުން ފުލުހުން ވަނީ، އެ ބިދޭސީން ދިރިއުޅުނު ތަނުގެ ފޮޓޯތަކެއް ވެސް އާންމުކޮށްފައެވެ. އެ ފޮޓޯތަކުން ފެންނަ ގޮތުގައި، ވަރަށް ކުޑަކޮށް ހުރި އެ ތަނުގެ ތެރޭގައި ގިނަ އަދަދެއްގެ ކުރުނބާތައް ބަހައްޓާފައި ހުރީ އެމީހުން ލާން ގެންގުޅޭ ހެދުންތައް ކައިރީގައެވެ. އަދި، އެ މީހުން ގެންގުޅޭ ބައެއް ސާމާނުތައް އެތަނުގައި ބަހައްޓާފައި ހުރިއިރު، އެއީ އެހާ ސާފުތާހިރު ތަނެއް ނޫންކަން ފެނެއެވެ. އެގޮތުން، ބައެއް ތަކެތި ބިންމަތީގައި ބަހައްޓާފައި ހުރިއިރު، އެ ތަނުގައި ދެ އެނދެއް ހުރުމުން އެމީހުން ނިދާ ހަދަނީ ވެސް އެތަނުގައި ކަމަށް ބެލެވެއެވެ. https://sun.mv/214597 އިމިގްރޭޝަނުގެ ބެލުމުގެ ދަށަށް ގެނައި ބިދޭސީން ދިރިއުޅެމުން ދިޔަ ތަން: އެތަނުގައި ކުރުނބާ ފަނި ހަދައިގެން ބިދޭސީން ޑެލިވަރީ ކުރާ ކަމަށް ފުލުހުން ވަނީ ބުނެފައި ---- ފޮޓޯ/ ފުލުހުން އިކޮނޮމިކް މިނިސްޓްރީން މިދިޔަ ބުރާސްފަތި ދުވަހު ވަނީ، ރާއްޖޭގައި ގަވައިދާ ޚިލާފަށް ވިޔަފާރިކުރާ ބިދޭސީން ރިޕޯޓުކުރުމަށް އެދިފައެވެ. އޭގެފަހުން، ހޮނިހިރު ދުވަހު އިކޮނޮމިކް މިނިސްޓަރު މުޙައްމަދު ސައީދު ވަނީ، އެ އިޢުލާނު ކުރިތާ ފުރަތަމަ 41 ގަޑިއިރު ތެރޭ، ބިދޭސީން ގަވައިދާ ޚިލާފަށް ހިންގާ ކަމަށް ފާހަގަ ކުރެވޭކަމަށް، 29 ވިޔަފާރިއެއްގެ ރިޕޯޓު އާންމުން ހުށަހަޅައިފައިވާ ކަމަށް ވިދާޅުވެފައެވެ. މިދިޔަ އަހަރުގެ އޮގަސްޓް މަހު ފާސްކޮށް އެ އަހަރުގެ ސެޕްޓެމްބަރު މަހު އަމަލުކުރަން ފެށި ފޮރިން އިންވެސްޓްމެންޓް ގާނޫނުގެ ދަށުން މިދިޔަ އޮކްޓޯބަރު މަހުގެ އަށްވަނަ ދުވަހު އިކޮނޮމިކް މިނިސްޓްރީން ވަނީ ބިދޭސީންނަށް ވިޔަފާރިކުރެވޭނެ ދާއިރާތަކާއި ވިޔަފާރިކުރުން މަނާ ދާއިރާތައް އާންމުކޮށްފައެވެ. އެގޮތުން 34 ދާއިރާއަކުން ވިޔަފާރިކުރުން ބިދޭސީންނަށް މަނާވާނެއެވެ. އޭގެ ތެރޭގައި އޮންލައިން ވިޔަފާރި ހިމެނޭހެން ރީޓެއިލް އަދި ހޯލްސޭލް ވިޔަފާރިއާއި ކެފޭ ރެސްޓޯރަންޓު ހިންގުމާއި ވަޒީފާތަކަށް މީހުން ހޯދުމުގެ ޚިދުމަތްދިނުމާއި ޓިއުޝަން ކްލާސްތަކާއި ޤުރުއާން ކްލާސްތައް ހިންގުމާއި އަތްތެރި މަސައްކަތްކުރުމާއި ފޮޓޯ އަދި ވީޑިއޯގްރަފީގެ ޚިދުމަތްތަކާއި ގާނޫނީ ވަކީލުކަމުގެ ޚިދުމަތްތައް ހިމެނެއެވެ.