"އެދުވަހު އެ ފޭކް މެސެޖު ފޮނުވީ ކާކުކަން އެނގުމުގެ ކުރިން ހަގީގަތް ހާމަކުރާކަށް ބޭނުމެއް ނޫން..." އާކިލް ހުރީ ގޮތްދޫކުރާ ގޮތަކަށް ނޫނެވެ. "އަހަރެން ބޭނުންވަނީ އޭރު އީވްގެ ރެޕިއުޓޭޝަން ހަރާބުކޮށްލީ ކާކުކަން ހޯދަން... އޭގެ ކުރިން ކޮންމެ މީހަކު އަހަންނާ ދޭތެރޭ ކޮންމެ ގޮތަކަށް ދެކުނަސް، އަހަންނަށް ނަފުރަތުކުރިޔަސް ވަރިހަމަ... މިހާރުވެސް މީހަކު އެ މަސައްކަތް ކުރަނީ އީވްއަށް ގެއްލުންދޭން... ކިހިނެއް އެނގެނީ އެމީހަކު ނޫންކަމެއް މިހާރުވެސް އެކަމެއް އެކުރަނީ.... އޭރު އެހެންވިޔަސް، މިއަދު އީވް ހިމާޔަތްކުރަން އަހަރެން މަސައްކަތް ކުރާނަން..." ******** ކޮތަޅުތަކެއް ހިފައިގެން އައިސް ކެފޭއަށް ވަން މިރާހުގެ ބޮލުގެ އިސްތަށިގަނޑުގެ ތަރުތީބު ގެއްލިފައިވާއިރު، ދެންމެ މީހަކާ ޒުވާބުކޮށްފައި އައި ކަހަލަ ވަރުބަލިކަމެއް މޫނުން ފެންނަން ހުއްޓެވެ. "މިރާހް!..." ރިމްޝާ ފުންމައިގެން ގޮނޑިން ތެދުވިއެވެ. "ތިއައީ ދިވެހި ރުކަކާ ހަނގުރާމައެއްކޮށްފަތަ؟...." މުޅި ތަނުގައި ހަރުލީ ރިމްޝާގެ ސަކަ ހިނިގަނޑުގެ އަޑެވެ. ނުހޭން ހުއްޓަސް، އިވްލީނަށްވެސް ހެވުނެވެ. "ދެން އެކަހަލަ ކަމެއް..." މިރާހް ގަދަކަމުން ހިނިތުންވެލިއެވެ. "މަންމަމެންނާ މައްސަލައެއް ޖެހުނީ؟..." މިރާހުގެ އަތުން ބައެއް ކޮތަޅުތައް އަތުލަމުން އިވްލީން ސުވާލުކުރިއެވެ. "މިދެން ކޮންމެ ދުވަހެއްގެވެސް އާދައެއްނު..." މިރާހް ދޫކޮށްލީ ފުން ނޭވާއެކެވެ. "ކައުންސިލުން އިއުލާންކޮށްފަ އޮތް ޖޮބަށް އެޕްލައިނުކޮށްގެން މަންމަ ހުރީ ރުޅިގަދަވެފަ... އަހަރެން މިހާރު ފައިސާ ހޯދާގޮތެއް މަންމަމެންނަށް ކަމަކުނުދޭ... ހޫނު ގޮނޑިއެއްގަ އިނދެގެން ފައިސާ ހޯދިދާނެ... އެކަމަކު އަހަރެންގެ ހިތް ވާނީ މަރު..." "އެންމެ މުހިއްމީ މީހާ އުފަލުގަ ހުރުން... މިރާހަކީ މަސައްކަތަށް ފަރުވާތެރި މީހެއް..." މިރާހްގެ ކޮނޑުގައި މަޑުމަޑުން ޖަހައިލަމުން އިވްލީން ބުނެލިއެވެ. މިރާހްގެ ދެލޯ ވިދައިލިއެވެ. މޫނުމަތި އުޖާލާވިއެވެ. މަންމަގެ ބަސްތަކުން ހިތަށްކުރި އަސަރު ވަގުތުން ފިލައިދިޔަ ކަހަލައެވެ. އިވްލީންގެ އެންމެ ޖުމުލައަކުންވެސް މިރާހުގެ މަރުވަމުންދާ ހިތަށް ދިރުން ލިއްބައިދެނީ އަޖައިބުކުރުވަނިވި ގޮތަކަށެވެ. މިރާހުގެ މޫނުމަތީގެ އަސަރުތަކަށް ބަލަން އިން ރިމްޝާއަށް އެކަން ފާހަގަ ނުވެއެއް ނުދިޔައެވެ. ރިމްޝާއަށް އުނދަގޫ ގޮތަކަށް ހިންދިރުވައިލެވުނެވެ. ތަރުކާރީ ކޮތަޅުތައް ހިފައިގެން ކައުންޓަރާއި ދިމާއަށް ހިނގައިގަތް ވަގުތު، އިވްލީން ކުޑަކޮށް އަރިއަޅައިލާގޮތްވިއެވެ. އޭނާ އަވަސް އަވަހަށް ގޮނޑިއެއްގައި ހިފަހައްޓައި، ހަށިގަނޑު ސީދާކުރިއެވެ. ރިމްޝާއަށް އެމަންޒަރު ފެނުމުން، ދުވެފައި ގޮސް އިވްލީންގެ ގައިގައި ހިފެހެއްޓިއެވެ. "އީވް އޯކޭތަ؟..." އިވްލީންގެ އަތުން ކޮތަޅުތައް އަތުލަމުން ރިމްޝާ ސުވާލު ކުރިއެވެ. އިވްލީން ހާސްވެފައި މިރާހަށް އަވަސް ނަޒަރެއް ދިނެވެ. މިރާހް ހުރީ، އޭނާ ގެނައި ފިނިކުރި އެއްޗެހި އައިސްއަލަމާރިއަށް އަޅާށެވެ. އިވްލީނަށް ކިރިޔާ ކަމެއްވިކަން އެނގުނަސް، ކެފޭގެ ހުރިހާ ކަމެއް މިރާހް އެކަނި ކޮށް ނިންމައިލާނެކަން އޭނާއަށް އެނގެއެވެ. "އޯކޭއޭ..." މިރާހަށް އެމަންޒަރު ފެނިދާނެތީ، އިވްލީން ވާހަކަ ދެއްކީ މަޑުންނެވެ. "އީވް އޯކޭއެއް ނޫން... މިތާ އިށީނދޭ!..." ރިމްޝާ އިވްލީންގެ ގައިގައި ހިފެހެއްޓިއެވެ. ގޮނޑީގައި ބައިންދަން އުޅުނު ނަމަވެސް އެ ފުރުސަތު ދޭކަށް އިވްލީން ބޭނުމެއް ނުވިއެވެ. "މިގަޑީ ނީނދެވޭނެއޭ... ޓައިމްއެއް ނެތް.." ރިމްޝާގެ އަތުން ކޮތަޅުތައް އަތުލަމުން އިވްލީން ބުނެލިއެވެ. ކެފޭގެ ދޮރު ހުޅުވުނު އަޑު އިވުނެވެ. އެތެރެއަށް ވަން އާކިލް ފެނި އެންމެން ހުއްޓުން އެރިއެވެ. އާކިލް ހުރީ ދަބަހެއް އަޅުވައިގެންނެވެ. ޓީޝާޓަކާއި ސޯޓެއްގައި ހުރިއިރު، އާކިލް އަޅައިގެން ހުރި އައިނު ނަގައި، ޓީޝާޓުގެ ކަރުގައި އަޅުވައިލިއެވެ. އެހެން ދުވަސް ދުވަހަށްވުރެ އާކިލްގެ ފިރިހެންވަންތަކަން އިތުރުވެފައިވާހެން އިވްލީނަށް ހީވިއެވެ. މިރާހުގެ ދެބުމަ ކައިރިވީއިރު، ރިމްޝާ ތުން ފިއްތައިލިއެވެ. އެންމެން ތިބިއިރުވެސް އާކިލްގެ ނަޒަރު ހުއްޓިފައިވީ ހަމައެކަނި އިވްލީނަށެވެ. އާކިލް ބަލަން ހުރިގޮތުން އިވްލީންގެ ހިތުގެ ތެޅުން އަވަސްވިއެވެ. "މިއައީ ކެމެރާއެއް ހިފައިގެން... މިތާ ހަރުކުރަން..." އާކިލް އޭނާ ގެނައި ދަބަސް މޭޒުމަތީގައި ބޭއްވިއެވެ. "މިދިމާލުގަ އަޅުވައިފިއްޔާ، ކެފޭގެ އެތެރެއާ އެއްކޮށް ކެމެރާއަށް އަރާނެ... އެތެރެއަށް ވަންނަ މީހުންނާ، ބޭރުން އެހިސާބުން ދާ މީހުން އެއްކޮށް ފެންނާނެ.." "ކާކު ބުނީ ކެމެރާ ހަރުކުރާށޭ؟..." އިވްލީން ކުޑަކޮށް ހިތްހަމަނުޖެހިފައި ސުވާލުކުރިއެވެ. "މީހަކު ނުބުނޭ..." އެންމެންގެ ތެރޭގައި އިވްލީން ކުރި ސުވާލުން އާކިލް ކުޑަކޮށް ހުއްޓުންއަރާގޮތް ވިއެވެ. "ދެން ކީއްކުރަން އާކިލް ތިކަމާ އުޅެންވީ؟... މީ އާކިލްއާ އެއްވެސް ގުޅުމެއް ހުރި ތަނެއް ނޫނޭ..." އިވްލީން ހަނދާންކޮށްދިނެވެ. "އީވް ނުބުންޏަސް، ކޮންމެވެސް މީހަކު މިކަމަށް އެޓެންޑްކުރަން އެބަ ޖެހެއެއްނު... އީވްއަށް ގެއްލުންދޭން މަސައްކަތްކުރާ މީހާ ހޯދަން އެބަ ޖެހެއެއްނު..." އާކިލް މަޑުމަޑުން ހިނގާލާފައި ގޮސް އިވްލީންގެ ކައިރީގައި ހުއްޓުނެވެ. "ތިކަންކަމާ ވިސްނާނީ އަހަރެމެން.." އިވްލީނަށްވުރެ ކުރިން މިރާހް ބުނެލިއެވެ. "އަހަރެމެންނަށް ކެމެރާވެސް ހަރުކުރެވޭނެ... އެމީހަކުވެސް ހޯދޭނެ..." "ދެން ކީއްވެބާ މިހުރިހާއިރު ވީއިރުވެސް އެކްޝަންއެއް ނުނެގުނީ؟..." އާކިލް ހިތްހަމަނުޖެހިފައި މިރާހަށް ބަލައިލިއެވެ. "މިއޮތީ ކެމެރާ... ހަރުކޮށްލާ!... ހުރިހާ އެއްޗެއްވެސް ބޭގްތެރޭ ހުންނާނެ... ހީކޮށްލާ މީ އަހަރެމެން މިރަށުގަ ހިންގަންއުޅޭ ޕްރޮޖެކްޓްގެ ތެރެއިން މިތަނަށް ވެދިން އެހީއެއް ކަމަށް..." "އާކިލް ކީއްވެތަ ތިހެން ތިއުޅެނީ؟..." އެހެން މީހުންނަށް ނީވޭހާ މަޑުން، ޝަކުވާގެ ރާގެއްގައި އިވްލީން ސުވާލުކުރިއެވެ. "އީވް ބުނެބަލަ... ތިސުވާލުގެ ޖަވާބު އެންމެ ރަނގަޅަށް އެނގޭނީ އީވްއަށް..." އާކިލް ބަލަން ހުރީ ސީދާ އިވްލީންގެ ދެލޮލަށެވެ. އާކިލް ކައިރިވެލިގޮތުން، އިވްލީންގެ ނޭވާވެސް ހީވީ އެތެރޭގައި ތާށިވި ހެންނެވެ. ދެލޯ ބޮޑުކޮށްލަމުން އޭނާއަށް ކުޑަކޮށް ފަހަތަށް ޖެހިލެވުނެވެ. އާކިލްގެ ތުންފަތަށް ވެރިވީ ލުއި ހިނިތުންވުމެކެވެ. ވައްކަމެއް ކުރަން އުޅެނިކޮށް ފަޅާއެރުމުން ކުރެވޭފަދަ އިހުސާސެއް ކުރެވުމުން އިވްލީން އަވަހަށް އެހެން ދިމާއަކަށް ނަޒަރު ހުއްޓައިލިއެވެ. "ހީވަނީ ވަރިވެފަ ތިބި ދެ މުސްކުޅިން ވާހަކަ ދައްކާހެން... ނޫންތަ މިރާހް؟..." މިރާހްގެ ކައިރިއަށް ޖެހިލަމުން ރިމްޝާ ބުނެލިއެވެ. ނުހޭން ހުއްޓަސް، ރިމްޝާގެ ރާގު ހުރިގޮތުން މިރާހްގެ ކައިރިއަށް ހިނިއައެވެ. މިރާހް ކެފޭ އިން ބޭރަށް ނުކުތުމުން ރިމްޝާވެސް ފަހަތުން ނުކުތެވެ. "އަހަންނަށް އެނގޭ މިރާހް ލައިކްވާ ކަން..." ރިމްޝާ ބޭނުންވި މައުޟޫޢު ފެށިއެވެ. "ތިބުނީ؟..." ފަހަތް ބަލައިލުމެއްނެތި މިރާހް ސުވާލުކުރިއެވެ. މިރާހް ޑަސްބިނަށް ކުނިތައް އަޅާފައި އެނބުރުނުއިރު، ރިމްޝާ ހުރީ އޭނާގެ ފަހަތުގައި، ކައިރީގައި ވިއްދާފައެވެ. ކުރިއަށް ހިނގައިގަންނަން އުޅުނު މިރާހް ވަގުތު ހުއްޓުނެވެ. ރިމްޝާގެ ގައިގައި ޖެހިދާނެތީ އޭނާ އަވަހަށް ފަހަތަށް ޖެހިލިއެވެ. "ކޮންމެސް މީހަކުދެކެ..." މިރާހް އެއްބަސް ނުވާނެކަން އެނގުނު ނަމަވެސް ރިމްޝާ ބޭނުންވީ އެ މައުޟޫޢުއަށް ވާހަކަ ދައްކާށެވެ. "ކާކުދެކެބާ؟..." ކެފޭއާއި ދިމާއަށް ހިނގައިގަންނަމުން މިރާހް ބުނެލިއެވެ. "ހަމަ ނުބުނަންވެގެން..." ރިމްޝާ ތުންފިއްތައިލިއެވެ. "އަމިއްލަ ނަފުސަށްވެސް އޮޅުވާލަންތަ ތިއުޅެނީ؟...." މިރާހް ދެފަރާތަށް ބޯ ހޫރާލާފައި ގޮސް ކެފޭއަށް ވަނެވެ. އޭރު އިވްލީން ހުރީ އައިސްއަލަމާރިއަށް ތަރުކާރީތައް އަޅާށެވެ. ފަހަރަކު ބާވަތެއް ނަގައި، އިވްލީންގެ އަތަށް ދޭން އާކިލް ހުރިއިރު، އެ މަންޒަރުން މިރާހްގެ ހިތަށް އުނދަގޫ ގޮތެއް ވިއެވެ. ތަރުކާރީތައް އަޅާ ނިންމާފައި، އިވްލީން އައިސްއަލަމާރީގެ ދޮރު ލެއްޕިއެވެ. އެވަގުތު އިވްލީންގެ ކަރުގައި އަޅާފައި އޮތް ފަށުފުލުން ކުޑަ ހޫނުކަމެއް އޭނާއަށް އިހުސާސްވިއެވެ. ފަށުފޫ މަޑު ފެހިކުލައަކުން ދިއްލުނު ތަން އާކިލްއަށްވެސް ފެނުނެވެ. އެ އަލި، ދެ ފޫޓެއްހައި ދުރުމިނަށް އެޅިފައި ހުއްޓެވެ. އިވްލީން ގަނޑުވިއެވެ. އަބަދުވެސް މަޑު ފެހިކުލައަކުން ދިއްލޭ އެ ގައުކޮޅުގެ އަލި އެހާ ދުރަށް ފާޅުވި އެއީ ފުރަތަމަ ފަހަރެވެ. "ތީ ކޯއްޗެއް؟..." ގައުކޮޅަށް އިޝާރާތް ކުރަމުން އާކިލް ސުވާލުކުރިއެވެ. "ފަށުފުލެއްނު..." ފަށުފޫ ނުފެންނާނޭހެން ހެދުމުގެ ތެރެއަށް ކޮއްޕައިލަމުން އިވްލީން ބުނެލިއެވެ. "އެކަމަކު، ދިއްލެނީ ކީއްވެ؟..." އާކިލް ބޭނުންވީ ޔަގީންކުރާށެވެ. "މީ.. މީ... އާ ޓެކްނޮލޮޖީއެއް..." އިވްލީން އަވަސް އަވަހަށް ބުނެލިއެވެ. "އެހެންވިއްޔާ، އަހަރެން މީ އިންގްލޭންޑްގެ ކުއީން..." އާކިލް ސަމާސާކޮށްލިއެވެ. އިވްލީން އެއްޗެއް ބުނުމުގެ ކުރިން ބޭރުން ގަދަ އަޑެއް އިވުނެވެ. މޭޒެއްގެ މަތީގައި ބަރު އެއްޗަކުން ޖެހުނު އަޑު ކަހަލަ އަޑެކެވެ. އެންމެންގެ ނަޒަރު އެއްފަހަރާ ކަހަލަ ގޮތަކަށް ބޭރަށް ހުއްޓުނެވެ. އިވްލީން ހީކުރީ ކައިރި ހިސާބެއްގައި ހުރި ރުކަކުން އެއްޗެއް ވެއްޓުނީ ކަމަށެވެ. މިރާހް ދުވެފައި ބޭރަށް ނުކުތެވެ. ރިމްޝާވެސް ފަހަތުން ނުކުތެވެ. އެންމެންގެ ފަހަތުން ދާން އުޅުނު އިވްލީނަށް ކުރިއަށް ނެގުނީ އެންމެ ފިޔަވަޅެކެވެ. ހަށިގަނޑުގައި ވަރު ނެތުމާއިއެކު، އިވްލީން އަރިއަޅައިލިއެވެ. އާކިލްގެ ބާރުގަދަ އަތުން އިވްލީން ހިފަހައްޓައިލީ ހުށިޔާރުކަމާއި އެކުގައެވެ. "މަޑުމަޑުން..." އާކިލްގެ މޫނުން ފެނުނީ ކަންބޮޑުވުމުގެ އަސަރެވެ. "އައި އޭމް ފައިން.." އާކިލް އާއި ދުރަށްޖެހިލަމުން އިވްލީން ބުނެލިއެވެ. "ތިހާލުގަވެސް ޕްރިޓެންޑް ކުރާނަން؟..." އާކިލް އެއްބުމަ އުފުލައިލިއެވެ. އަޑު އައި ދިމާއަށް ދިޔަ މިރާހަށް ފެނުނީ މޭޒުމަތީގައި އޮތް ކުޑަ ފުޅިއެކެވެ. ފުޅީގެ ބޭރުގައި ރަތްކުލަ ހާކާފައިވާއިރު، މަތިގަނޑުގެ ދަށުން ކުޑަ ކަރުދާސްކޮޅެއް ފެންނަން އޮތެވެ. މިރާހުގެ އަތުން ފުޅި އަތުލާފައި ރިމްޝާ އެ ކަރުދާސްކޮޅު ނެގިއެވެ. އެތެރޭގައި ލިޔެފައި އޮތް އެއްޗެއް ފެނުމުން، ރިމްޝާގެ ދެލޯ ބޮޑުވިއެވެ. "ކަންތައް އިތުރަށް ގޯސް ނުވަނީސް މިތަނުން ދޭ... އެހެންނޫނީ، ކައިރީ ތިއުޅޭ މީހުންނަށްވެސް އަހަރެންގެ އުނދަގޫ ކުރިމަތިވެދާނެ..." އަނެއްކާވެސް އިންޒާރުގެ މެސެޖެކެވެ. "ކާކު؟..." ވަށައިގެން ހޯދައިލަމުން ރިމްޝާ ބާރަށް ގޮވައިލިއެވެ. "ޖެއްސުންކުރަން ދުރުގަ ނުހުރެ، ނިކަން ކުރިމައްޗަށް އަރާލަބަލަ... ހާދަ ފިނޑިއޭދޯ..." އާކިލް އައި ބާރުމިނުގައި ރިމްޝާގެ އަތުން ގަނޑުކޮޅު އަތުލިއެވެ. ލިޔުންކޮޅު ކިޔައިލުމާއިއެކު، ވަގުތުން އޭނާގެ ދެބުމަ ގޮށްޖެހުނެވެ. ތަކުރާރުކޮށް އެމީހަކު އިވްލީނަށް އިންޒާރު ދެނީއެވެ. ޖެއްސުން ކުރަނީއެވެ. އެއްވެސް ޖެހިލުމެއް ނެތިއެވެ. ގެއްލުމެއް ދޭން ވަކި ވަގުތެއް ބެލުމެއް ނެތިއެވެ. ކުރީ ފަހަރަށްވުރެ މިފަހަރުގެ މެސެޖު ދިގުވެފައި، ވަރުގަދައެވެ. ކައިރީގައި އުޅޭ މީހަކަށް ގެއްލުމެއް ލިބެން އިވްލީން ބޭނުން ނުވާނެކަން އާކިލްއަށް އެނގެއެވެ. އަމިއްލަ ނަފުސަށްވުރެ އިވްލީން އަބަދުވެސް އެހެން މީހުން އިސްކުރެއެވެ. އާކިލް ވަށައިގެންވި މާހައުލަށް އަވަސް ނަޒަރެއް ދިނެވެ. އެއިން ހިސާބެއްގައިވެސް މީހަކު ފެންނާކަށް ނެތެވެ. ކެފޭގެ ކުރިމަތީގައި އޮންނަ ގަސްތަކުގެ ތެރޭގައިވެސް މީހަކު ހުރިތޯ ބެލިއެވެ. ގަސްތަކުގެ ތެރެއިން އާކިލްއަށް ފެނުނީ ކުރީ ދުވަހުވެސް ފެނުނު ކަހަލަ ފިޔަވަޅުތަކެކެވެ. ދުވެފައި ގޮސް ހުރި ކަހަލަ ގޮތަކަށް ހުރި އެ ފިޔަވަޅުތައް ނިމިފައި ހުރީ، އަތިރިމަތިން އެއްގަމަށް އެރެން އޮންނަ މަގާއި ހަމައަށެވެ. އާކިލް ވަގުތުން އެ މަންޒަރުތައް އޭނާގެ ފޯނުގައި ރައްކާކުރިއެވެ. އިވްލީން ހުރީ ގަނޑުވެފައެވެ. އަނެއްކާވެސް އަނެއް އިންޒާރެވެ. މިފަހަރު އެންމެންވެސް ތިއްބައެވެ. ކައިރިކައިރީގައި އިންޒާރުތައް ދޭން ފެށުމުން އިވްލީންގެ ހިތަށް ބިރުވެރިކަން ވަނެވެ. އެކަނި ހުންނަ ވަގުތެއްގައި މީހަކު އައިސް ގޯނާކޮށްފާނެތީ މިހާރުވެސް އެހިތް ބިރުން ތެޅެނީއެވެ. އަނެއްކޮޅުން އޭނާ ލޯބިވާ މީހަކަށް ގެއްލުމެއް ލިބިއްޖެއްޔާ ވާނީ ކިހިނެއް ހެއްޔެވެ؟ އިވްލީނަށް އަމިއްލަ ނަފުސަށް ދުވަހަކުވެސް މަޢާފެއް ނުދެވޭނެއެވެ. "އެމީހަކު މިކަމެއް ނުހުއްޓާނެ... ޖެހޭނީ ރެޑްހޭންޑްކޮށް ހިފަން..." އިވްލީން ހުރިގޮތުން އާކިލް ދެރަވިއެވެ. އެއްޗެކޭ ބުނަން އިވްލީން އަނގަ ހުޅުވައިލިއެވެ. އެކަމަކު އަޑެއް ބޭރެއް ނުވިއެވެ. އާކިލްއަށް އިވްލީންގެ ދެކޮނޑުގައި ހިފަހައްޓާލެވުނީ އަމިއްލަ އިހުތިޔާރުން ބޭރުގައެވެ. އިވްލީންގެ ހަށިގަނޑުގެ ވަރު ދިޔައެވެ. އާކިލްގެ އަތުގެ ތެރެއަށް އަމިއްލަ ބާރު ދޫކޮށްލައިގެން ހުރިއިރު، އެ މޫނުން ފެންނަން ހުރީ ވަރުބަލިކަމެވެ. އަރާމުކުރަން އެދެލޯ އެދޭވަރު ހާމަވާން ހުރިއިރުވެސް، އިވްލީންގެ ހިތް އެކަމަށް އެއްބަސް ނުވެއެވެ. "އީވްއަށް މިތާ އެއްވެސް ރައްކާތެރިކަމެއް ނެތް... ނުރައްކަލެއްގެ ފެށުން އަންނާނީ މިކަހަލަ ގޮތަކަށް..." އާކިލްގެ އަޑުގައިވީ އޯގާތެރިކަމެވެ. އާކިލް ބޭނުންވީ އިވްލީނަށް ވިސްނައިދޭށެވެ. އަމިއްލަ ސިއްހަތަށް ނުބަލާ ދަންވަންދެން އެކަނި ކެފޭގައި މަސައްކަތް ކޮށްގެން އިވްލީނަށް ލިބޭނެ މޮޅެއް އޮތްކަމަކަށް އާކިލްއަކަށް ގަބޫލެއް ނުކުރެވުނެވެ. އާކިލް ކީ އެއްވެސް އެއްޗެއްގެ އަޑު އިވްލީނަކަށް ނީވުނެވެ. "އެއީ ތެދެއް... މީގެ ފަހުން އީވް އެކަނި މިތާ ނުހުންނާތި!..." ރިމްޝާ ބުނެލިއެވެ. ކެފޭގެ ފުރަގަހުން މީހަކު ދުއްވައިގަތް ކަހަލަ އަޑެއް އިވުނެވެ. އާކިލް އާއި މިރާހަށް އެދިމާއަށް ދުއްވައިގަނެވުނީ އެކުއެކީގައެވެ. ރިމްޝާވެސް އެމީހުންގެ ފަހަތުން ދުއްވައިގަތެވެ. ކޮންމެވެސް މީހަކު އިވްލީންގެ ކުރިމަތީގައި ހުއްޓުނެވެ. (ނުނިމޭ)