2024 ވަނަ އަހަރުގެ ޑިސެންބަރު 1 ވަނަ ދުވަހުން ފެށިގެން، ދިވެހިރާއްޖޭގެ އެއަރޕޯޓުތަކުން ބޭރަށް ފުރާ ފަސިންޖަރުންގެ އަތުން ނަގާ ޑިޕާޗަރ ޓެކުހާއި އެއަރޕޯޓް ޑިވެލޮޕްމަންޓް ފީގެ ރޭޓުތަކަށް ބަދަލު އަންނާނެ ކަމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން އިއުލާނުކޮށްފިއެވެ.މި ބަދަލު އަންނަނީ "ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކުހާއި ފީ ނެގުމާބެހޭ ޤާނޫނު" އަށް ގެނެވުނު 2 ވަނަ އިޞްލާޙުގެ ދަށުންނެވެ. މި ބަދަލާ އެކު، ދިވެހި އަދި ބިދޭސީ ފަސިންޖަރުންގެ އަތުން ނަގާ ޓެކުހާއި ފީގެ އަދަދުތަކަށް ބަދަލު އަންނާނެއެވެ.އައު ރޭޓުތަކުގައި، އިކޮނޮމީ ކްލާހުގައި ދަތުރުކުރާ ދިވެހިންގެ އަތުން ޑިޕާޗަރ ޓެކުހާއި އެއަރޕޯޓް ޑިވެލޮޕްމަންޓް ފީގެ ގޮތުގައި ނަގާނީ 12 އެމެރިކާ ޑޮލަރެވެ. އެހެންނަމަވެސް، ބިދޭސީންގެ އަތުން މި ދެ ބައިގެ ގޮތުގައި ނަގާނީ 50 އެމެރިކާ ޑޮލަރެވެ. ބިޒްނަސް ކްލާހުގައި ދަތުރުކުރާ ފަރާތްތަކުން 120 އެމެރިކާ ޑޮލަރު، ފަސްޓް ކްލާހުގައި ދަތުރުކުރާ ފަރާތްތަކުން 240 އެމެރިކާ ޑޮލަރު، އަދި ޕްރައިވެޓް ޖެޓުގައި ދަތުރުކުރާ ފަރާތްތަކުން 480 އެމެރިކާ ޑޮލަރު ދައްކަންޖެހޭނެއެވެ.މީރާއިން ފާހަގަކޮށްފައިވާ ގޮތުގައި، އެއަރޕޯޓު ޑިވެލޮޕްމަންޓް ފީ ނަގާނީ ހަމައެކަނި ވެލާނާ އިންޓަރނޭޝަނަލް އެއަރޕޯޓުން ބޭރަށް ފުރާ ފަސިންޖަރުންގެ އަތުންނެވެ. އެހެން އެއަރޕޯޓުތަކުން ބޭރަށް ފުރާ ފަސިންޖަރުންގެ އަތުން ނަގާނީ ޑިޕާޗަރ ޓެކްސް އެކަންޏެވެ.މި ބަދަލު ތަންފީޒުކުރަން ފަށާނީ 2024 ވަނަ އަހަރުގެ ޑިސެންބަރު 1 ވަނަ ދުވަހުން ފެށިގެންނެވެ. އެ ތާރީޚުގައި ނުވަތަ އޭގެ ފަހުން ޓިކެޓު ގަންނަ ނުވަތަ ދަތުރުގެ ތާރީޚު ބަދަލުކުރާ ފަސިންޖަރުންގެ އަތުން ޓެކުހާއި ފީ ނަގާނީ މި އައު ރޭޓުތަކުގައެވެ.މި ބަދަލާ ގުޅޭގޮތުން އިތުރު މަޢުލޫމާތު ހޯދުމަށް ބޭނުންވާ ފަރާތްތަކަށް މީރާގެ ހޮޓްލައިން 1415 އަށް ގުޅުމަށް ނުވަތަ [email protected] އަށް އީމެއިލް ކުރުމަށް މީރާއިން އިރުޝާދު ދީފައިވެއެވެ.