ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން އެތައް ބަޔަކު މަރުވެ، ލިބިފައިވާ ގެއްލުންތަކާ ގުޅިގެން، އެހީތެރިކަން ފޯރުކޮށްދިނުމަށްޓަކައި، 50،000 ޑޮލަރާއި 25،000 ކޭސް މަސްދަޅު ހަދިޔާކުރަން ދިވެހި ސަރުކާރުން ނިންމައިފި އެވެ.މިކަން ހާމަކޮށްފައިވަނީ ރާއްޖޭގެ ފޮރިން މިނިސްޓްރީން މިއަދު ނެރުނު ބަޔާނެއްގަ އެވެ.އެ ގޮތުން މި އެހީ ދޭން ނިންމީ ތޫފަން "ޑިޓްވާ" ގެ ސަބަބުން ލަންކާގެ ރައްޔިތުންނަށް ދިމާވެފައިވާ ގެއްލުންތަކާއި ދަތިތަކުން އަރައިގަތުމަށް ކަމަށް އެ ބަޔާނުގައި ބުނެފައިވެ އެވެ."އަދި ރާއްޖެއިން އުއްމީދުކުރަނީ މި ފޯރުކޮށްދިން އެހީގެ ސަބަބުން ހާލުގައި ޖެހިފައިވާ އެ ގައުމުގެ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ސްރީލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރަކަށް ލުއިކަމެއް ލިބޭނެ ކަމަށެވެ،" އެ ބަޔާނުގައި މިނިސްޓަރު ވިދާޅުވި އެވެ.މި އެހީ ރަމްޒުކޮށްދެނީ ދެ ގައުމުގެ ދެމެދުގައި އޮތް ގާތް ގުޅުން ކަމަށްވެސް ބަޔާނުގައި ބުނެފައިވެ އެވެ.ތޫފާން ޑިޓްވާގެ ސަބަބުން ލަންކާއަށް ކުރަމުންދާ ބޯ ވިއްސާރައިގައި ފެން ބޮޑުވެ ހިނގި ހާދިސާތަކުގައި މިހާތަނަށް 69 މީހުން މަރުވެފައިވާ ކަމަށް ރިޕޯޓްތައް ބުނެ އެވެ.