ބާސެލޯނާ (ނޮވެމްބަރު 29) - ސްޕެނިޝް ލީގުގައި މިރޭ ފަހަތުން އަރައި ޑިޕޯޓިވޯ އަލަވޭސް އަތުން 3-1 އިން މޮޅުވެ، ލީގު ތާވަލުގެ އެއް ވަނަ އަށް ބާސެލޯނާ އިން ޖެހިލައިފި އެވެ.
ލީގު ތާވަލުގެ އެއް ވަނައިގައި ބާސެލޯނާ އިން އޮތީ 14 މެޗުން 34 ޕޮއިންޓާ އެކު އެވެ. ދެ ވަނައިގައި އޮތް ރެއާލް މެޑްރިޑަށް ވަނީ 13 މެޗުން 32 ޕޮއިންޓް ލިބިފަ އެވެ. މި ހަފްތާގައި، ޖިރޯނާ އަތުން މޮޅުވެގެން، އަލުން ރެއާލަށް އެއް ވަނަ އަށް އެރޭނެ އެވެ.
އަމިއްލަ ދަނޑުގައި މިރޭ ބާސެލޯނާ އިން ފަށަން ޖެހުނީ އުނދަގޫ ކޮށެވެ. އެ ގޮތުން މެޗު ފަށައިގެން، ފުރަތަމަ މިިނިޓްގައި އަލަވޭސް އިން ލީޑުނެގި އެެވެ. ބާސެލޯނާގެ މާކް ކަސާޑޯ އަށް ހެދުނު ގޯހެއްގެ ފައިދާނަގައި، އެ ޓީމު ކޮޅަށް އަލަވޭސްގެ ލަނޑު ޖެހީ، ޕަބްލޯ އިބަނޭޒް އެވެ.
އަލަވޭސް އަށް ލީޑުގައި އޮވެވުނީ ހަ މިނިޓެވެ. މެޗުގެ އަށް ވަނަ މިނިޓްގައި، ރޮބަޓް ލެވަންޑޯސްކީ ތަނަވަސްކޮށްދިން ފުރުސަތެއްގައި ގޯލުގެ މަތީ ދާގަނޑަށް ބޯޅަ އަމާޒުކޮށްލައި ލަމީން ޔަމާލް ވަނީ ބާސެލޯނާ އަށް އެއްވަރުކޮށްދީފަ އެވެ. އަދި، މެޗުގެ 26 ވަނަ މިނިޓްގައި ރަފީނިއާ ދިން ބޯޅައަކުން، ޑެނީ އޮލްމޯ ވަނީ ބާސެލޯނާ އަށް ލީޑުނަގައިދީފަ އެވެ.
ފުރަތަމަ ހާފު ނިމުމުގެ ކުރިން ބާސެލޯނާ އަށް ތިން ވަނަ ލަނޑެއް ޖަހައިދޭން ޔަމާލަށް އޭރިއާތެރެއިން ހުސްކޮށް ލިބުނު ފުރުސަތުގެ ބޭނުންނުހިފުނެވެ.
މެޗުގެ ތިން ޕޮއިންޓް ބާސެލޯނާ އިން ކަށަވަރުކޮށްދިން ލަނޑު ޖެހީ މެޗުގައި މޮޅު ކުޅުމެއް ދެއްކި އޮލްމޯ އެވެ. އޮލްމޯ، މެޗުގެ އިތުރު ވަގުތުގައި މި ލަނޑު ޖެހީ ޔަމާލް ދިން ބޯޅައަކުންނެވެ.