ރާއްޖޭގައި ގަވައިދާ ހިލާފަށް ބިދޭސިން ހިންގާ 29 ވިޔަފާރިއެއްގެ ރިޕޯޓު މިހާތަނަށް ލިބިފައިވާ ކަމަށާއި އެކަމާ ގުޅޭ ހާއްސަ ޓާސްކްފޯހެއްގެ މަސައްކަތް މިއަދު ފަށާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ވީ ކިހިނެއް؟ - ބިދޭސީންނަށް ރާއްޖޭގައި ކުރުން މަނާކޮށްފައިވާ ވިޔަފާރިތައް ބިދޭސީން ކުރާނަމަ އެކަން ރިޕޯޓު ކުރުމަށް އިކޮނޮމިކް މިނިސްޓްރީން ވަނީ ބުރާސްފަތި ދުވަހު އެދިފަ އެވެ.
ތަފްސީލް - އިކޮނޮމިކް މިނިސްޓަރު މުހައްމަދު ސައީދު މިއަދު އެކްސްގައި ވިދާޅުވީ އެފަދަ މައްސަލަތައް ރިޕޯޓުކުރަން އިއުލާނުކުރިތާ 41 ގަޑިއިރު ތެރޭ އެފަދަ 29 ވިޔަފާރިއަކާ ގުޅޭޭ ރިޕޯޓުތައް ލިބިފައިވާ ކަމަށެވެ.
މިކަމާ ގުޅިގެން ރައީސް މުހައްމަދު މުއިއްޒު ޓާސްކުފޯހެއް އެކުލަވާލައްވާފައިވާ ކަމަށާއި ޓާސްކުފޯހުގެ މަސައްކަތް މިއަދު މެންދުރުފަހު ފަށާނެ ކަމަށް މިނިސްޓަރު ވިދާޅުވި އެވެ. އަދި ރިޕޯޓު ކުރާ ވަރަކުން އެފަދަ ތަންތަން ބަލައި ފާސްކޮށް، ގާނޫނީ ފިޔަވަޅު އަޅާނެ ކަމަށް ވެސް އޭނާ ވިދާޅުވި އެވެ.
ގުޅުން ހުރި - އިކޮނޮމިކް މިނިސްޓްރީން ބުނީ ގާނޫނާ ހިލާފަށް ބިދޭސީން ދެ ގޮތަކަށް ވިޔަފާރިކުރާކަން ފާހަގަކުރެވިފައިވާ ކަމަށެވެ. އެއީ:
ނިވާފަތްގަނޑަކަށް ދިވެހިން ހަދައިގެން ބިދޭސީން ހިންގާ ވިޔަފާރިތައް
ފޮރިން އިންވެސްޓްމަންޓް ގާނޫނުގެ ދަށުން ބިދޭސީންނަށް ހުއްދަނުކުރާ ދާއިރާތަކުގައި ހަރަކާތްތެރިވަމުން އަންނަ ބިދޭސީ ވިޔަފާރިތައް
ތަފްސީލް - މިފަދަ މައްސަލައެއްގެ މައުލޫމާތު ލިބިއްޖެ ނަމަ ރިޕޯޓްކުރަން ޖެހޭ ގޮތަކީ:
ބިދޭސީންނަށް ރާއްޖޭގައި ވިޔަފާރި ކުރުން މަނާ ދާއިރާއެއްގައި ހަރަކާތްތެރިވާކަން ފާހަގަކުރެވޭ ނަމަ އެކަމުގެ މައުލޫމާތު ލިބިފައިވާ ނަމަ މިނިސްޓްރީގެ ވެބްސައިޓް މެދުވެރިކޮށް ރިޕޯޓްކުރުން
މިނިސްޓްރީގެ ހޮޓްލައިން 3333199އަށް ގުޅައިގެން ރިޕޯޓްކުރުން (ހޮޓްލައިނަށް ގުޅޭނީ ހެނދުނު 8 އިން ރޭގަނޑު 8އަށް)
އިމިގްރޭޝަން ވޮޗުއަށް ރިޕޯޓްކުރުން
އެނގުން މުހިންމު - ފޮރިން އިންވެސްޓްމަންޓްގެ ގާނޫނުގެ ދަށުން ބިދޭސީންނަށް މަނާކޮށް، ހަމައެކަނި ދިވެހިންނަށް ހާއްސަކޮށްފައިވާ ދާއިރާތަކަކީ:
އިމާރާތްތަކަށް ހިދުމަތްތައް ދިނުމާއި ލޭންޑްސްކޭޕިންގެ މަސައްކަތްތައް
އޮފީސްތަކަށާއި ވިޔަފާރިތަކަށް ސަޕޯޓް ދިނުމުގެ މަސައްކަތްތައް
15 މިލިއަން ޑޮލަރަށް ވުރެ ދަށުން ހިންގާ ޕްރޮޖެކްޓްތަކުގެ ދަށުން އިމާރާތްތައް އެޅުމުގެ މަސައްކަތްތައް
10 މިލިއަން ޑޮލަރަށް ވުރެ ދަށުން ހިންގާ ޕްރޮޖެކްޓްތަކުގެ ދަށުން ރިސޯޓުތައް ހެދުމުގެ މަސައްކަތްތައް
ޓިއުޝަން ކްލާސްތަކާއި ގުރުއާން ކްލާސްތައް ހިންގުމުގެ މަސައްކަތްތައް
ފިޒިއޮތެރެޕީ ފިިޔަވައި އެހެނިހެން ކްލިނިކްތައް ހިންގުމުގެ މަސައްކަތްތައް
ކާގޯ އާއި ލޮޖިސްޓިކް އަދި ޕޯސްޓުގެ ހިދުމަތުގެ މަސައްކަތްތައް
ސުވެނިއާ އާއި އަތްތެރި މަސައްކަތްތައް
ބަންކަރިންގެ ހިދުމަތް ދިނުމުގެ މަސައްކަތްައް
މީޑިއާތައް ހިންގުމުގެ މަސައްކަތްތައް
އެޑްވަޓައިޒިން އަދި އިވެންޓް މެނޭޖްމަންޓްގެ މަސައްކަތްތައް
ގާނޫނީ ހިދުމަތް ދިނުމުގެ މަސައްކަތްތައް
މާކެޓް ރިސާޗު ހެދުމުގެ މަސައްކަތްތައް
އިލެކްޓްރޯނިކް ރިޕެއާގެ މަސައްކަތްތައް
ރީޓެއިލްގެ މަސައްކަތްތައް
ކޮންސްޓްރަކްޝަން ތަކެތީގެ ހޯލްސޭލްގެ މަސައްކަތްތައް