ސާޖަރީއަށްފަހު ސެޕްޓެންބަރު 16 ވަނަ ދުވަހު ހާޝިމް ރާއްޖެއަށް އައިސްފައިވާ ކަމަށާއި، އަދި އޭނާ ބަލި ހާލަތު ހުރި ގޮތުން ޑޮކްޓަރު ދެއްވި ރެކޮމެންޑޭޝަނާ އެއްގޮތަށް ޖަލުގައި ފަރުވާދެވެން ނެތުމުން ވަގުތީ ގޮތުން އޭނާ ގޭބަަންދަށް ބަދަލުކޮށްފައިވޭ
ކުޑަކުއްޖަކާ ބެހުނު ކަމުގެ ތުހުމަތުގައި ޖަލުގައި ހުރި އުމުރުން ދުވަސްވީ މީހަކު މިނިވަންކޮށްފިކަމަށް ބައެއް މީހުން މީސްމީޑިޔާގައި ފަތުރަމުންދާ ވާހަކައަކީ ދޮގެއްކަމަށާއި، އޭނާ ގޭ ބަންދަށް ބަދަލުކުރީ ޖަލުގައި ހުރެގެން ނުލިބޭ ފަރުވާއެއް ދިނުމަށް ކަމުގައި ކަރެކްޝަންސްއިން ބުނެފި އެވެ. 
މި މައްސަލާގައި ހިމެނޭ މީހަކީ ހއ.ހޯރަފުށީ، އަންދަލީބުގޭ ހާޝިމް އަބޫބަކުރެވެ. އުމުރުން 57 އަހަރުގެ މި މީހާއަކީ 2022 ވަނަ އަހަރުން ފެށިގެން ޖަލު ހުކުމެއް ތަންފީޒުކުރަމުން އަންނަ މީހެކެވެ. އޭނާ މައްޗަށް ހުކުމްކުރީ ކުޑަކުއްޖަކާ ޖިންސީ ގުޅުމެއް ހިންގަން އުޅުނު މައްސަލަައެއްގަ އެވެ. 
ކަރެކްޝަންސްއިން ބުނި ގޮތުގައި ހާޝިމަކީ 2022 ވަނަ އަހަރުން ފެށިގެން އުނަގަނޑުގެ މައްސަލައެއް ދިމާވެ، އެކަމުގައި ވޭން ތަހައްމަލުކުރާ މީހެއް ކަމަށެވެ. އަދި އެ މައްސަލާގައި އޭނާ ސާޖަރީއެއް ހަދަންޖެހޭ ކަމަށްވެސް އެ އިދާރާއިން ބުނެފައިވެ އެވެ. 
އިތުރަށް އެ އިދާރާއިން ބުނީ އެ ސާޖަރީއަކީ ރާއްޖެއިން ހެދެން ނެތް ސާޖަރީއެއްކަމަށް ކަރެކްޝަންސްގެ މެޑިކަލް ބޯޑުން ނިންމުމުން 5 އޯގަސްޓު 2024 ގައި ރާއްޖެއިން ބޭރަށް ސާޖަރީ ހެދުމަށް ދާން ހުއްދައެއް ދިން ކަމަށެވެ. 
ހަދަންޖެހޭ ސާޖަރީއަށްފަހު ސެޕްޓެންބަރު 16 ވަނަ ދުވަހު ހާޝިމް ރާއްޖެއަށް އައިސްފައިވާ ކަމަށާއި، އަދި އޭނާ ބަލި ހާލަތު ހުރި ގޮތުން ޑޮކްޓަރު ދެއްވި ރެކޮމެންޑޭޝަނާ އެއްގޮތަށް ޖަލުގައި ފަރުވާދެވެން ނެތުމުން ވަގުތީ ގޮތުން އޭނާ ގޭބަަންދަށް ބަދަލުކޮށްފައިވާ ކަމަށް ކަރެކްޝަންސްއިން ބުންޏެވެ. 
އަދި އެ އިދާރާގެ އުސޫލުތަކާ އެއްގޮތަށް އޭނާ ގޭގައި ހުންނައިރު މޮނިޓާކޮށް ބެލެހެއްޓުމުގެ މަސައްކަތް އެ އިދާރާއިން ކުރަމުން އަންނަ ކަމުގެ ޔަގީންކަން ކަރެކްޝަންސްއިން ދީފައިވެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ