ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހޮޓަލް ޖެންގައި ހުންނެވުމަށް ހަރަދުކުރަނީ ސަރުކާރުން ކަމަށް އެމަނިކުފާނު ވިދާޅުވެއްޖެއެވެ.
ރައީސް ނަޝީދު މިފަދައިން ވިދާޅުވީ މިއަދު ރައްޔިތުންގެ މަޖިލީހުގައި ކުރިއަށްގެންދާ ނޫސްވެރިންގެ ބައްދަލުވުމުގައެވެ. އެ ބައްދަލުވުމުގައި ރައީސް ނަޝީދު ވިދާޅުވީ އެމަނިކުފާނު އެދިވަޑައިގަންނަވަނީ އެމަނިކުފާނަށް ހާއްސަކުރާ ގެކޮޅަށް ވީހާވެސް އަވަހަށް ބަދަލުވެވަޑައިގަތުމަށް ކަމަށެވެ. އަދި އެމަނިކުފާނު ޖެން ހޮޓަލުގައި ހުންނަވަނީ އެމަނިކުފާނަށް ދައުލަތުން ހަމަޖައްސާ ގެކޮޅުގެ މަސައްކަތް ނިމެންދެން ކަމަށެވެ.
މީގެ އިތުރުން ރައީސް ނަޝީދު އަމިއްލަ ގެކޮޅުގައި ހުންނަވަން ވަރަށް ބޮޑަށް އެދިވަޑައިގަންނަވާ ކަމަށާއި، ނަމަވެސް އެގޮތަށް އަމިއްލަ ގެކޮޅަށް ބަދަލުވެވަޑައިގަތުމަށް އެމްއެންޑީއެފުން ހުއްދަ ނުދޭ ކަމަށް ވެސް ވިދާޅުވިއެވެ.
ރައީސް ނަޝީދުގެ ސަލާމަތާއި ރައްކާތެރިކަމާމެދު ކަންބޮޑުވަނީ އެމަނިކުފާނުގެ ދެ ދަރިކަނބަލުން ކަމަށްވެސް ވަނީ ވިދާޅުވެފައެވެ.