ރާއްޖޭގައި ބިދޭސީން ގަވައިދާ ހިލާފަށް ހިންގާ ވިޔަފާރިތައް ރިޕޯޓް ކުރަން އިއުލާން ކުރުމުގެ 14 ގަޑިއިރު ތެރޭގައި 29 ތަނެއް ރިޕޯޓްކޮށްފައިވާ ކަމަށް އިކޮނޮމިކް މިނިސްޓްރީން ބުނެފި އެވެ.އިކޮނޮމިކް މިނިސްޓްރީން ބުރާސްފަތި ދުވަހު ގެޒެޓްކުރި އިއުލާނެއްގައި ވަނީ، ރާއްޖޭގައި ގަވާޢިދާ ޚިލާފަށް ފުޅާ ދާއިރާއެއްގައި، ބިދޭސީން ވިޔަފާރި ކުރަމުންގެންދާ ކަމުގެ ޝަކުވާ، އަބަދުވެސް ސަރުކާރުގެ އިދާރާތަކަށް ލިބެމުން އަންނަ ކަމަށެވެ. އެހެންވެ، އެފަދަ ވިޔަފާރިތައް ރިޕޯޓު ކުރުމަށް އެ މިނިސްޓްރީން އެދުނެވެ.އެ އިއުލާނާ ގުޅޭ ގޮތުން ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެ އިޢުލާނު ކުރިތާ ފުރަތަމަ 41 ގަޑިއިރު ތެރޭ، ބިދޭސީން ގަވައިދާ ޚިލާފަށް ހިންގާ ކަމަށް ފާހަގަ ކުރެވޭކަމަށް، 29 ވިޔަފާރިއެއްގެ ރިޕޯޓު އާންމުން ހުށަހަޅައިފައިވާ ކަމަށެވެ.ގަވައިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ރައީސް ޑރ. މުހައްމަދު މުއިއްޒު އެކުލަވައިލެއްވި ޓާސްކްފޯހަށް އިޝާރާތް ކުރައްވައި ސައީދު ވިދާޅުވީ، މިއަދު މެންދުރުފަހުން ފެށިގެން އެ ޓާސްކް ފޯސްގެ އޮޕަރޭޝަންތައް ފަށާނެ ކަމަށެވެ.ބިދޭސީން ރާއްޖޭގައި ވިޔަފާރި ކުރުން މަނާ 34 ދާއިރާއެއްގެ ލިސްޓެއް ދާދި ފަހުން އާންމު ވެސް ކޮށްފައިވެ އެވެ. މިނިސްޓްރީން ބުނީ ގަވާއިދާ ހިލާފަށް ބިދޭސީން ހަރަކާތްތެރިވާ ދެ ގޮތެއް އެ ވުޒާރާއަށް ފާހަގަވާކަމަށެވެ. އެއީ ނިވާފަތްގަނޑަކަށް ދިވެހިން ހަދައިގެން ބިދޭސީން ހިންގާ ވިޔަފާރިތަކާއި ފޮރިން އިންވެސްޓްމަންޓް ޤާނޫނުގެ ދަށުން ބިދޭސީންނަށް ހުއްދަ ނުކުރާ ދާއިރާތަކުގައި ހަރަކާތްތެރިވަމުމެވެ.ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދަން އިމިގްރޭޝަނުން ވެސް އޮޕަރޭޝަނެއް ކުރިއަށް ގެންދާ އިރު، ބިދޭސީންގެ ވިޔަފާރި ހިންގާ އެތައް ވިޔަފާރިއެއް މި ފަހުން ހުއްޓުވާފައިވެ އެވެ.