އިންޑިއާއިން ހުށަހެޅި ސެޓެލައިޓް ލޮކޭޝަން ޓްރެކިންއަށް ފޯނު ކުންފުނިތަކުން ދެކޮޅު ހަދައިފިއެވެ. އިންޑިއާ ސަރުކާރުން، ފޯނު އުފައްދާ ކުންފުނިތަކަށް ހުށަހަޅާފައިވަނީ ސެޓެލައިޓް މެދުވެރިކޮށް މީހުން ހުރިތަން ދެނެގަތުމުގެ ޓެކްނޮލޮޖީ (ލޮކޭޝަން ޓްރެކިން) އަބަދު ހުޅުވާލައިގެން ބޭނުންކުރުމަށެވެ. ފޯނު އުފައްދާ ކުންފުނިތަކުން މިކަން ދިރާސާކުރަމުން ދާއިރު، މިކަމަށް އެޕަލް، ގޫގުލް އަދި ސެމްސަންގް ފަދަ ބޮޑެތި ފޯނު ކުންފުނިތަކުން ވަރުގަދައަށް ދެކޮޅު ހަދަމުން ދަނީ ޕްރައިވެސީއާ ގުޅޭ ގޮތުން ބޮޑެތި ކަންބޮޑުވުންތަކެއް ހުރީތީކަމަށް ބުނެއެވެ. އިންޑިއާ ސަރުކާރުން ބޭނުންވަނީ ތަހުގީގުތަކުގައި މީހުން ހުރި ސީދާ ތަން ދެނެގަތުމަށް ކަމަށްވިޔަސް، މިކަމުގެ ސަބަބުން ފޯނު ބޭނުންކުރާ ފަރާތްތަކުގެ ޕްރައިވެސީއަށް ބޮޑެތި ނުރައްކާތައް ކުރިމަތިވެދާނެ ކަމަށް މާހިރުން އަންނަނީ ބުނަމުންނެވެ. މިހާރު ތަހުގީގުތަކުގައި މީހުން ހުރިތަން ދެނެގަތުމަށް ބޭނުންކުރާ ސެލިއުލާ ޓަވަރުގެ ދިރާސާތަކުން ލިބޭ މައުލޫމާތު ސީދާނުވުމަކީ އިންޑިއާ ސަރުކާރުން ވަރަށް ކަންބޮޑުވާ ކަމެކެވެ. މިހާރުގެ ނިޒާމުން އެނގެނީ ހަމައެކަނި މީހަކު ހުރި ސަރަހައްދެއްގެ ކައިރި ހިސާބެއްގެ މައުލޫމާތު ކަމުގައިވާތީ، މިއީ އެތައް މީޓަރެއްގެ ތަފާތުތަކެއް އަންނަ ކަމެކެވެ. މި ސަބަބަށްޓަކައި، އިތުރަށް ސީދާ މައުލޫމާތު ލިބޭނެ ގޮތެއް ހޯދުމަށް އިންޑިއާ ސަރުކާރުން ވަނީ މަސައްކަތް ފަށާފައެވެ. ޓެލެކޮމިއުނިކޭޝަން ކުންފުނިތައް ތަމްސީލުކުރާ ސެލިއުލާ އޮޕަރޭޓާސް އެސޯސިއޭޝަން އޮފް އިންޑިއާ އިން ހުށަހަޅާފައިވަނީ ސެޓެލައިޓް ސިގްނަލާއި ސެލިއުލާ ޑޭޓާ ބޭނުންކުރާ އޭ-ޖީޕީއެސް ޓެކްނޮލޮޖީ ބޭނުންކޮށްގެން، ސްމާޓްފޯނުތަކުގައި ލޮކޭޝަން ސާވިސް އަބަދު އެނގޭނެ ގޮތެއް ހެދުމަށެވެ. މީގެ މާނައަކީ ބޭނުންކުރާ ފަރާތްތަކަށް ލޮކޭޝަން ސާވިސް ނިއްވާލުމުގެ ފުރުސަތު ނުދިނުމެވެ. ނަމަވެސް އެޕަލް، ސެމްސަންގް އަދި ގޫގުލް ފަދަ ބޮޑެތި ސްމާޓްފޯނު އުފައްދާ ކުންފުނިތަކުން ވަނީ މިކަމާ ވަރުގަދައަށް ދެކޮޅު ހަދާފައެވެ. އިންޑިއާ ސެލިއުލާ އެންޑް އިލެކްޓްރޯނިކްސް އެސޯސިއޭޝަން އިން ސަރުކާރަށް ފޮނުވި ސިއްރު ސިޓީއެއްގައި ބުނެފައިވަނީ، އޭ-ޖީޕީއެސް ނެޓްވޯކް ސާވިސް "ސަވައިލަންސްއަށް ބޭނުންކުރާ ގޮތަށް ތަރައްގީކޮށްފައި ނުވާނެ" ކަމަށާއި، މިފަދަ ކަމަކަށް އަމުރުކުރުމަކީ "ގާނޫނީ ހައްދު ފަހަނައަޅާ ދިއުމެއް" ކަމަށެވެ. ދުނިޔޭގެ އެއްވެސް ތަނެއްގައި މިފަދަ ޑިވައިސް-ލެވެލް ލޮކޭޝަން ޓްރެކިން އަމަލުކުރާ ނިޒާމެއް ނެތް ކަމަށް ވެސް އެ ކުންފުނިތަކުން ވަނީ ފާހަގަކޮށްފައެވެ. ޑިޖިޓަލް ފޮރެންސިކްސްގެ މާހިރުން ބުނާ ގޮތުގައި، ވަކި އެޕްތައް ބޭނުންކުރާއިރު ނުވަތަ ކުއްލި ހާލަތްތަކުގައި ގުޅާއިރު އެކަނި މިހާރު ބޭނުންކުރާ އޭ-ޖީޕީއެސް ޓެކްނޮލޮޖީ އަބަދު ހުޅުވާލައިގެން ބޭނުންކުރާނަމަ، ބޭނުންކުރާ މީހަކު ހުރިތަން މީޓަރަކަށްވުރެ ކުޑަ ދުރުމިނެއްގެ ތެރެއިން ސީދާކޮށް ދެނެގަނެވޭނެއެވެ. ބްރިޓަންގެ އިންސްޓިޓިއުޝަން އޮފް އިންޖިނިއަރިން އެންޑް ޓެކްނޮލޮޖީއާ ގުޅުންހުރި ޖުނޭޑް އަލީ ވިދާޅުވީ، މި ހުށަހެޅުމުގެ ސަބަބުން ފޯނުތައް ހަގީގަތުގައިވެސް "ޚާއްސަ ސަވައިލަންސް ޑިވައިސްއެއް" ގެ ގޮތުގައި މަސައްކަތްކުރަން ފަށާނެ ކަމަށެވެ. މި ހަފުތާގައި އިންޑިއާ ސަރުކާރުން، ސްމާޓް ފޯނު އުފައްދާ ކުންފުނިތަކުން ދައުލަތުގެ ސައިބާ ސޭފްޓީ އެޕެއް ހުރިހާ ޑިވައިސްއެއްގައި ޕްރީލޯޑްކުރުމަށް ނެރުނު އަމުރެއް ވެސް އަނބުރާ ގެންދަން މަޖުބޫރުވިއެވެ. އެއީ އެކްޓިވިސްޓުންނާއި ސިޔާސީ ބޭފުޅުން ސަވައިލަންސްއާ ގުޅޭ ކަންބޮޑުވުންތައް ފާޅުކުރުމުންނެވެ. މިފަދަ ކަންކަމުގެ ތެރެއިން، މިހާރުވެސް ޓެލެކޮމް ކުންފުނިތަކުން ބުނަނީ، މީހުން ހުރިތަން ދެނެގަތުމަށް މަސައްކަތްކުރާއިރު ފޯނުތަކުގައި ކެރިއާއިން ލޮކޭޝަން އެކްސެސްކުރަން ފޮނުވާ މެސެޖަކީ ތަހުގީގުތަކަށް ހުރަހެއް ކަމަށެވެ.