ބީއެމްއެލްގެ "އަހަރެންގެ ބޭންކް ކޮމިއުނިޓީ ފަންޑު"ގެ ދަށުން ގދ. ވާދޫގައި ސްކޭޓް ޕާކެއް ތަރައްގީކޮށް މިއަދު ހުޅުވައިފި އެވެ.
މި ޕާކުގައި ސްކޭޓު ކުރުމަށް ހާއްސަ ތަނެއްގެ އިތުރުން އިޖުތިމާއީ ހަރަކާތްތަކާއި އިވެންޓުތައް ބާއްވާނެ ސަރަހައްދެއް ވެސް ވަނީ ހިމަނައިފަ އެވެ. މި ޕްރޮޖެކްޓު ހިންގުމަށް ކޮމިއުނިޓީ ފަންޑަށް ޕްރޮޕޯސަލް ހުށަހެޅިީ ހުވަދޫ އެސޯސިއޭޝަން ފޯ ޓޫރިޒަމް (ހެޓް) އިންނެވެ.
ބީއެމްއެލް އިން ވާދޫގައި ސްކޭޓް ޕާކެއް ހުޅުވައިފި--ފޮޓޯ:ބީއެމްއެލް
ބީއެމްއެލް އިން ބުނީ މިއީ ރަށުގެ ކުޑަކުދިންނާއި ޒުވާނުންނަށް ހުސްވަގުތު އާ ހުނަރެއް ދަސްކޮށްދީ އެކުވެރި މާހައުލެއް ގާއިމް ކުރުމަށް ހުޅުވި ޕާކެއް ކަމަށެވެ. އަދި އެ ރަށަކީ ރާޅާ އަޅާ ގިނަ ބަޔަކު އުޅޭ ރަށަކަށްވުމުން ސްކޭޓް ޕާކު މެދުވެރިކޮށް އެ ހުނަރުވެސް ދަސްވާނެ ކަމަށް ބޭންކުން ބުންޏެވެ.
މީގެ އިތުރުން ހުވަދު އަތޮޅުގައި ޓޫރިޒަމް ފުޅާވެގެން އަންނައިރު މި ޕާކުގެ ސަބަބުން އިތުރު ވަޒީފާގެ ފުރުސަތު ވެސް ހުޅުވިގެންދާނެ ކަމަށް ބޭންކުން ބުންޏެވެ.
ބީއެމްއެލް އިން ވާދޫގައި ސްކޭޓް ޕާކެއް ހުޅުވައިފި--ފޮޓޯ:ބީއެމްއެލް
ހެޓްގެ ރައީސް އަހުމަދު ތާރިފް މުހައްމަދު ވިދާޅުވީ މި ޕާކުގެ ސަބަބުން އެ ރަށުގެ ޒުވާނުންގެ މެދުގައި ގުޅުން ބަދަހިވެ، އެއްބައިވަންތަކަމުގެ ރޫހު އަށަގަންނާނެ ކަމަށެވެ. އަދި މި ޕާކުގެ ސަބަބުން ކުދިންނަށް އިތުރު ހުނަރެއް ދަސްވެގެންދިއުމަކީ އެންމެ ބޮޑު އެއް މަގުސަދު ކަމަށް ވެސް އޭނާ ވިދާޅުވި އެވެ.
ބީއެމްއެލް އިން ވާދޫގައި ސްކޭޓް ޕާކެއް ހުޅުވައިފި--ފޮޓޯ:ބީއެމްއެލް
"މި ސްކޭޓް ޕާކުގެ ސަބަބުން ކުދިންނަށް އިތުރު ހުނަރެއް ދަސްވުން އެއީ އަޅުގަނޑުމެންގެ އެންމެ މުހިންމު އެއް މަގުސަދު. މި ޕާކާއެކު މުނިފޫހިފިލުވުމާއި ކުޅިވަރުގެ ތެރެއިން ޒުވާނުންގެ މެދުގައި ގުޅުން ބަދަހިވެ އެކަތިގަނޑަކަށް ވުމުގެ ފުރުސަތު ހުޅުވިގެންދާނެ. މި ފުރުސަތުގައި މި މުޖުތަމައަށް ނުހަނު ބޭނުންތެރި މިފަދަ ޕްރޮޖެކްޓަކަށް އެހީތެރިވެދެއްވި ކަމަށްޓަކައި ބީއެމްއެލް އަށް ހާއްސަ ޝުކުރެއް ދަންނަވަން،" ތާރިފް ވިދާޅުވި އެވެ.
ހެޓްގެ އަމާޒަކީ ރާއްޖޭގެ އަދި ރާއްޖޭން ބޭރުގެ ފަރާތްތަކާއި ގުޅިގެން ސްކޭޓްކުރުމުގެ ތަމްރީންތައް ދިނުމެވެ.
ބީއެމްއެލް އަހަރެންގެ ބޭންކް ކޮމިއުނިޓީ ފަންޑަކީ އަމިއްލަ ފަރުދުންނާއި ޖަމިއްޔާތަކުން ރަށްރަށުގައި ހިންގާ ޕްރޮޖެކްޓުތަކަށް އެހީވާން ހުޅުވާލި ފަންޑެކެވެ. މި ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކާއި ތައުލީމާއި ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ.